Elimizde 654 eski vagon jolaýshy tasymaldap júr

ASTANA. QazAqparat – El aýmaǵynda qatynap júrgen 654 vagonnyń (32%) qoldaný merzimi 20 jyl jáne odan joǵary. Bul týraly «Jolaýshylar tasymaly» AQ bas dırektory Jánibek Taıjanov málim etti, dep habarlaıdy QazAqparat tilshisi.

«Búginde bizde qoldanysta 2098 vagon bar. Bizdiń eski vagondarǵa jıi-jıi syn aıtylady, biz ony qabyldaımyz. Qatynap júrgen 654 vagonnyń (32%) qoldaný merzimi 20 jyl jáne odan joǵary. Bul - eski vagondar. Ótken jyly 256 eski vagondy isten shyǵardyq. Sońǵy 10 jylda «Jolaýshylar tasymaly» AQ parki 50%-ǵa jańartyldy. Qaýipsizdik, jaılylyq jáne ekologııa talaptaryna sáıkes zamanaýı halyqaralyq talaptarǵa jaýap beretin 1200-den astam vagon satyp alyndy», - dedi Jánibek Taıjanov elordada jańa vagondardy tanystyrý barysynda.

Sondaı-aq, spıker Úkimettiń qoldaýymen jyl saıyn poıyz vagondary jańartylyp jatqanyn aıtty.

«Qazir 654 eski vagon bar. Olar ár baǵytta qatynaıdy. Qalǵan vagondar boıynsha 52% - bul shamamen 1100 vagon 11 jylǵa deıin qoldanylyp kele jatyr. Qalǵan bóliginiń paıdalanylǵan merzimi - 11-20 aralyǵynda», - deıdi ol.

Onyń aıtýynsha, isten shyqqan vagondardyń paıdalaný merzimi 40 jyl jáne odan da kóp bolǵan.