Elimizde 54 aýylda aýyz sý izdestirý jáne barlaý jumystary júrgizilmegen

NUR-SULTAN. QazAqparat – Elimizde 54 aýylda aýyz sý izdestirý jáne barlaý jumystary júrgizilmegen. Bul týraly búgin Úkimet otyrysynda Indýstrııa jáne ınfraqurylymdyq damý mınıstri Qaıyrbek Óskenbaev aıtty, dep habarlaıdy QazAqparat tilshisi.

«Memlekettiń el azamattaryn sapaly aýyz sýmen qamtamasyz etý jónindegi saıasaty jaqsy nátıjeler berip otyr. Sondaı-aq, sheshimin tappaǵan birqatar problemalyq máseleler de bar. Búginge deıin ortalyqtandyrylǵan sý júıesimen jabdyqtaý qurylysy josparlanǵan 54 aýylda izdestirý jáne barlaý jumystary júrgizilmegen. Atap aıtqanda, Túrkistan oblysynda - 30, Almaty oblysynda - 7, Batys Qazaqstan óńirinde - 5 jáne Jambyl oblysy boıynsha 5 aýylda atqarylmaǵan. Halyqtyń kóshi-qonyna baılanysty 50 aýyldyq eldi mekende sý qubyry jelilerin keńeıtý jumystaryn júrgizý qajet», - dedi mınıstr.

Onyń dereginshe, Almaty oblysynyń Keńdala aýylynda halyq paıdalanyp júrgen sý qubyry jelisi 1969 jyly salynǵan, aýyl halqyn aýyzsýmen tolyq qamtamasyz etý úshin ony rekonstrýktsııalaý qajet. Sońǵy bes jylda atalǵan aýylda halyq sany 5,8 myńnan 9,5 myń adamǵa deıin ósti.

«Mundaı aýyldarda sý qubyry jelilerin keńeıtý jumystaryn júrgizý úshin bıýdjetten shamamen 40 mlrd teńge qarajat qajet. Osyǵan baılanysty atalǵan aýyldyq eldi mekenderdiń turǵyndaryn sýmen 100 paıyz qamtý úshin ákimdikter sý qubyry jelilerin keńeıtý jumystaryna jobalyq-smetalyq qujattamalar ázirleý kerek», - dedi Qaıyrbek Óskenbaev.