Elimizde 500-den astam beıbit mıtıng ótti

NUR-SULTAN. QazAqparat – Ótken jyly elimizde beıbit mıtıng ótkizý týraly zań qabyldandy. Atalǵan zań aıasynda el azamattary qoǵamdy tolǵandyrǵan túrli máseleni kóterip, beıbit sherý uıymdastyryp jatyr. Osy oraıda 2020 jyldyń maýsymynan búginge deıin elimizde 500-den astam beıbit mıtıng ótipti.

Bul týraly QR Prezıdentiniń keńesshisi Erlan Qarın málim etti, dep habarlaıdy QazAqparat tilshisi.

«2020 jylǵa deıin elimizde jylyna shashamen 10 mıtıng ótse, ári ketse 30 mıtıng deıikshi. Búginde mıtıngke qatysty zań qabyldanyp, ony ótkizý memlekettik deńgeıde sheshildi. Ony ótkizý formaty da naqtylandy. 2020 jyldyń maýsymynan búginge deıin 1 jyldyń ishinde elimizde 500-den astam beıbit mıtıng ótipti. Bul jańa zańnyń jemisi ıaǵnı azamattarymyz óz oıy men talabyn erkin jetkize alady. Sonymen qatar biz aımaqtar boıynsha baqyladyq, qaı óńirde qandaı mıtıng ótýde jáne neni meńzep jatyr degen sekildi. Elimizde ótip jatqan beıbit sherýdiń deni ártúrli, ekologııalyq máselelerden bastap, memlekettik saıası reformalarǵa deıin qamtıdy», - dedi Erlan Qarın.

Eske sala ketsek, «Qazaqstanda beıbit jınalystardy uıymdastyrý jáne ótkizý tártibi týraly» zań jobasy ótken jyldyń mamyr aıynda qabyldandy.

Zańda beıbit jınalystardy uıymdastyrýshy men qatysýshynyń quqyqtary men mindetteri tolyqqandy qarastyrylǵan.

Aıta keteıik, búgin elordada Prezıdent keńesshisi elimizdiń belsendi jastarymen Memleket basshysynyń Joldaýy men elde asyp jatqan saıası jáne qoǵamdyq reformalardy ortaǵa salyp jatyr.