Elimizde 464 myń gektar aýmaqqa 1,1 mlrd tal egildi – mınıstr
Bul týraly Úkimet otyrysynda QR Ekologııa, geologııa jáne tabıǵı resýrstar mınıstri Maǵzum Myrzaǵalıev aıtty, dep habarlaıdy QazAqparat tlshisi.
«Orman qoryna jatatyn jerlerdiń jalpy kólemi 30 mln gektardy quraıdy jáne respýblıkamyzdyń 11%-in alyp jatyr. 13 mln gektar jerde orman ósip jatyr, orman kóleminiń kórsetkishi 4,8%-dy quraıdy. Ormandy alqaptar Qyzylorda, Jambyl oblystaryn alyp jatyr. Ol jerlerde negizinen sekseýilder ósedi. Balqaraǵaı, maıqaraǵaı, samyrsyn jáne shyrsha sııaqty asa qundy aǵash túrleriniń qorlary ShQO men Almaty oblysynda shoǵyrlanǵanyn aıta ketý qajet. Memleket basshysy qyrkúıek aıynda óziniń Joldaýynda eldi aýqymdy kógaldandyrý maqsatynda 5 jyl ishinde 2 mlrd tal egýdi tapsyrǵany belgili. Osyǵan baılanysty mınıstrlik oblys ákimdikterimen birlesip, óńirler boıynsha tal egý kólemi anyqtaldy», - deıdi QR Ekologııa, geologııa jáne tabıǵı resýrstar mınıstri Maǵzum Myrzaǵalıev.
Onyń aıtýynsha, ákimdikterdiń tabıǵat jáne orman qorǵaý mekemeleriniń ókilderi 464 myń gektar aýmaqta 1,1 mlrd tal ekti.
«Barynsha kóp tal egý Túrkistan, Qyzylorda jáne Jambyl oblystarynda josparlanyp otyr. Bul jerde atalǵan mólsherdiń negizgi úlesi sekseýil bolady. Aral teńiziniń qurǵap qalǵan bóliginde de osy jumystar atqarylady. Respýblıkanyń ortalyq óńirlerinde qaraǵaı, shyrsha, qaıyń sııaqty negizgi orman quraýshy tuqymdarǵa jatatyn taldar egiledi.
Budan basqa, Ulttyq parkter men rezervattar aýmaǵynda 62,5 myń gektar alqapta shamamen 250 mln kóshet otyrǵyzylady. Al kompensatsııa retinde otyrǵyzylatyn aǵashtar avtomobıl jáne temirjoldar boıyndaǵy qorǵanys jolaqtary, sondaı-aq halyqaralyq granttar esebinen 180-2000 gektar alqapqa 700 mln aǵash ósiriledi. Qazirgi ýaqytta respýblıka boıynsha 155 orman baǵy jumys isteıdi. Sonymen qatar, ýaqytsha tuqymbaqtar qurý máselesi týyndaýy múmkin. Orman mekemeleriniń materıaldyq-tehnıkalyq jabdyqtalýyn nyǵaıtý qajet ekenin aıtqym keledi», - deıdi ol.
