Elimizde 38 ýnıversıtet budan bylaı 150-den astam mamandyqty oqytpaıdy
Bul jaıynda Bilim jáne ǵylym mınıstrliginiń baspasóz qyzmeti málimet taratty.
Ótken jyldan bastap 38 joǵary oqý orny beıindi emes baǵyttar boıynsha 150-den astam lıtsenzııaǵa qosymshadan aıyryldy.
Taǵy tórt ýnıversıtet bıyl oqý jyly aıaqtalǵannan keıin 14 baǵyt boıynsha lıtsenzııasyn qaıtarady.
QR BǴM Bilim jáne ǵylym salasynda sapany qamtamasyz etý komıteti joǵary oqý oryndaryn beıindeý boıynsha jumys júrgizip jatyr.
Biliktilik talaptaryna sáıkes kelmeıtin baǵyttar boıynsha lıtsenzııaǵa qosymshany memlekettik joǵary oqý oryndary da, jekemenshik bilim ordalary da qaıtarady.
«Bilim jáne ǵylym salasynda sapany qamtamasyz etý komıteti joǵary oqý oryndarynda suranysqa ıe emes lıtsenzııalar boıynsha monıtorıng júrgizdi. Keıbir ýnıversıtetterde 1-4 kýrstarda barlyǵy 10-15 stýdent nemese ár kýrsta 3-4 adamnan oqıtyn baǵyttar bar ekenin kórdik. Mysaly, H.Dosmuhamedov atyndaǵy Atyraý ýnıversıtetinde bakalavrıattyń «mal sharýashylyǵy», «sý resýrstary» jáne «sýdy paıdalaný» baǵyttary boıynsha bilim alatyn stýdentterdiń sany az. Atalǵan mamandyqtar boıynsha tek 10-18 adam oqıdy. Mundaı jaǵdaı basqa da ýnıversıtetterde kezdesedi. Joǵary oqý oryndary qoldanystaǵy lıtsenzııalar boıynsha revızııa júrgizedi jáne dırektorlar keńesiniń otyrysynda kadr daıarlaýdyń beıindi emes baǵyttary boıynsha lıtsenzııany qaıtarý týraly sheshim qabyldaıdy», – deıdi QR BǴM Bilim jáne ǵylym salasynda sapany qamtamasyz etý komıtetiniń tóraıymy Gúlzat Kóbenova.
