Elimizde 35 myńǵa jýyq jetim bala bolsa, sonyń 85,5 paıyzy baspanaǵa qol jetkize almaı júr
ASTANA. 24 jeltoqsan. QazAqparat - Qazaqstanda jetim jáne ata-ana qamqorlyǵynsyz qalǵan balalar sany 34 785-ti quraıdy. Osy 35 myńǵa jýyq balanyń 85,5 paıyzy, ıaǵnı 29 myń 382-isi baspanaǵa qol jetkize almaı júr. Bul týraly búgin Májilistiń Áleýmettik-mádenı damý komıtetinde depýtattar «Qazaqstan Respýblıkasynyń keıbir zańnamalyq aktilerine jetim balalar men ata-anasynyń qamqorlyǵynsyz qalǵan balalardyń turǵyn úıge quqyqtaryn qamtamasyz etý máseleleri boıynsha ózgerister men tolyqtyrýlar engizý týraly» zań jobasyn talqylaý barysynda málim boldy.
Bilim jáne ǵylym vıtse-mınıstri Saıat Shaıahmetovtiń aıtýynsha, búgingi tańda elimizde 21 736 jetim bala qamqorshylyqqa alynyp, otbasylarda tárbıelenip jatyr. Onyń ishinde 4 287 balanyń bekitilgen turǵyn úıi bar bolsa, 9 174 bala baspana kezeginde tur. Patronattyq tárbıedegi 2 162 balanyń 420-synyń turǵyn úıge qoly jetse, osyndaı tárbıedegi 1 068 bala baspanadan úmittenip, áli kezek kútýde. Al balalar úıinde turyp jatqan 10 887 balanyń tek 696-sy ǵana baspanaly bolsa, 8 168 bala úı kezegine qoıylǵan.
«Sonymen qatar, sońǵy jeti jylda, ıaǵnı 2006 jyldan beri jetim balalar men ata-anasynyń qamqorlyǵynsyz qalǵan balalarǵa arnalǵan uıymdardyń 784 túlegi ǵana baspanaly boldy. Al osy jyldary jetimder úıinen barlyǵy 14 376 bala tárbıelenip shyqqan bolatyn. Onyń 6091-i kezekke qoıyldy», - dedi vıtse-mınıstr.
