Elimizde 3 aıda 216 784 jeńil kólik tirkeldi

NUR-SULTAN. QazAqparat - 2020 jylǵy qańtar-naýryzda elimizde 216 784 jeńil avtomobıl tirkeldi. Bul jaıynda QR Ulttyq ekonomıka mınıstrliginiń Statıstıka komıtetinen málim etti, dep habarlaıdy QazAqparat tilshisi.

«2020 jylǵy qańtar-naýryzda Qazaqstan Respýblıkasynda 216 784 jeńil avtomobıl tirkelgen nemese ótken jylǵy tıisti kezeńmen salystyrǵanda 1,8 paıyzǵa kemidi. Qazaqstan Respýblıkasynda 2020 jylǵy 1 sáýirdegi jaǵdaı boıynsha tirkelgen jeńil avtomobılderdiń sany 3 929,5 myń birlikti qurady. Osy jylǵy qańtar-naýryzda 3 959 adam zardap shekken 2 740 jol-kólik oqıǵasy tirkeldi. Ótken jylǵy tıisti kezeńmen salystyrǵanda apat sany 3,9 paıyzǵa kemidi», - delingen vedomstvo aqparatynda.

Komıtet málimetinshe, 2020 jyldyń 3 aıynda tirkelgen kólikterdiń 22 867-siniń shyǵarylǵanyna 3 jyl tolmasa, 38696-si 3-7 jyl buryn qurastyrylǵan kólikter eken. Al shyǵarylǵanyna 7 jyldan asqan, biraq 10 jyl bolmaǵan kólikterdiń sany - 30263, 10 jyldan asqan kólikter sany - 124 762.

Elimizde júıtkip júrgen kólikterdiń 84,1 paıyzy benzınmen, 13,2 paıyzy aralas, 2,5 paıyzy dızel otynymen, 0,2 paıyzy gazben júredi.