Elimizde 27 kelisimshart boıynsha ken oryndary ıgerilmeı kelgen

NUR-SULTAN. QazAqparat – Elimizde ken oryndaryn ıgerý mindettemesi oryndalmaıtyn 27 kelisimshart anyqtaldy. Bul týraly QR Energetıka mınıstri Bolat Aqsholaqov aıtty, dep habarlaıdy QazAqparat tilshisi.

«Prezıdenttiń 2022 jylǵy 21 qańtardaǵy qazaqstandyq iri bıznes ókilderimen kezdesýde bergen tapsyrmasy aıasynda mınıstrlik paıdalanylmaıtyn ken oryndaryna tekserý júrgizdi. Jumys nátıjesi boıynsha búgingi tańda mindettemeler oryndalmaıtyn 27 kelisimshart bar ekendigi anyqtaldy», - dedi ol mınıstrliktiń keńeıtilgen alqa otyrysynda.

Onyń atap ótýinshe, mınıstrlik 3 kelisimsharttyń qoldanysyn toqtatty.

Qalǵan 24 kelisimshart boıynsha bir aıdan úsh aıǵa deıin joıý merzimimen kelisimsharttyq mindettemelerdiń buzylǵany týraly habarlama jiberdi.

«Vıtse-mınıstr Ashat Hasenovke jer qoınaýyn paıdalanýshylar óz mindettemelerin oryndamaǵan jaǵdaıda, osy ken oryndaryn ıgerýge qabiletti ınvestorlarǵa odan ári berý úshin aýmaqty qaıtarýdy tapsyramyn», - dedi Bolat Aqsholaqov.