Elimizde 26 myń medıtsınalyq qyzmetker qosymsha qarjylyq kómek alatyn boldy
«Barlyq óńirde arnaıy sanıtarııalyq jáne medıtsınalyq kúshter jumysqa kirisip jatyr. Memleket basshysynyń tapsyrmasy boıynsha búgin tótenshe jaǵdaı memlekettik komıssııasy mańyzdy sheshim qabyldady. Koronavırýs ınfektsııasyn toqtatý jáne joıý sharalaryna qatysyp jatqan medıtsınalyq qyzmetkerlerdi materıaldyq qoldaý kórsetiletin boldy. Jalpy 26 myń medıtsınalyq qyzmetker qosymsha qarjylyq kómek alady. 26 myń áriptesimiz úsh topqa bólindi. Osy toptar ınfektsııalyq táýekelge baılanysty bolady. Birinshi top óte joǵary táýekel dep aıtýǵa bolady. Bul - ınfektsııalyq aýrýhanada jáne sol aýrýhanadaǵy ıntensıvti terapııa, reanımatsııa bólimshesinde jumys isteıtin dárigerler, meıirbıkeler, tómengi medıtsınalyq qyzmetkerlerge arnalǵan. Olarǵa aı saıyn naýryz aıynyń aılyǵynan bastap úsh aı 850 myń teńge qosymsha aılyq tólenedi», - deıdi QR Densaýlyq saqtaý mınıstri Eljan Birtanov.
Onyń aıtýynsha, ekinshi topta 12 myńǵa jýyq dáriger bar.
«Olar 425 myń teńge qosymsha jalaqy alady. Provızorlyq klınıkalarda jáne jedel járdem kómek dárigerleri – orta jáne kishi qyzmetkerler. Olar aýyrǵan naýqastarmen tikeleı baılanyspaıdy, biraq kúndelikti osy basqa aýrýlarmen, sonyń ishinde koronavırýs ınfektsııasymen aýyrǵan naýqastarmen jumys istegennen keıin ekinshi topqa engiziledi. Úshinshi toptyń ishine dárigerler de, orta jáne kishi medıtsınalyq qyzmetkerler, sanıtarlyq dárigerler kiredi. Olardyń sany - 11 myńǵa jýyq. Olar karantın nysandarynda, karantındik statsıonarlarda, áýejaılarda jumys isteıdi. Olarǵa aı saıyn 212,5 myń teńge tólenedi. Osy dárigerlerdiń bárine Prezıdent tapsyrmasy boıynsha memleket tarapynan úsh aıǵa 34 mlrd teńgege jýyq aqsha bólinedi», - deıdi ol.