Elimizde 25 myń 453 úleskerdiń qatysýyndaǵy qurylysy aıaqtalmaǵan 117 nysan qaldy
ASTANA. Sáýirdiń 22-ci. QazAqparat /Qanat Mámetqazyuly/ - 2010 jylǵy sáýirdiń 1-indegi jaǵdaı boıynsha elimizde úleskerlerdiń qatysýyndaǵy qurylysy aıaqtalmaǵan nysannyń sany 117-ni qurap otyr. Bul nysandarǵa 25 myń 453 úlesker qatysqan.
Búgin QR Parlamenti Májilisinde ótken dóńgelek ústel barysynda Qurylys isteri jáne turǵyn úı -kommýnaldyq sharýashylyǵy agenttiginiń tóraǵasy Serik Nokın osylaı málim etti, dep habarlaıdy QazAqparat.
«Memleket basshysynyń tapsyrmasyna sáıkes, búgingi kúni úlestik qurylysty qoldaý jónindegi jumystar jalǵasyp keledi. Premer-Mınıstrdiń birinshi orynbasary Ó. Shókeevtiń jetekshiligimen turaqty negizde jumys toby qyzmet etýde. Osyǵan uqsas jumys toptary úlestik qurylystar qamtylǵan elimizdiń barlyq óńirlerinde qurylǵan. Jumys toptary árbir nysandar boıynsha úlestik qurylystyń júzege asýyna kedergi faktorlardy áshkerelep, olardyń sebebin anyqtaıdy, naqty sheshimder qabyldaıdy. Sonymen birge, qurylys-montajdaý jumystarynyń monıtorıngi maqsatynda Agenttik Astana men Almaty qalalarynda apta saıyn baqylaý jumystaryn júrgizedi. Bundaı nysandardyń 90 paıyzy úlestik qurylys nysandary bolyp otyr», dedi S. Nokın.
Onyń aıtýynsha, Úkimet qabyldaǵan sharalar nátıjesinde 2010 jylǵy sáýirdiń 1-indegi jaǵdaı boıynsha qazir 25 myń 423 úleskerdiń qatysýyndaǵy 117 nysandy aıaqtaý qalyp otyr. Al 2007 jyldyń tórtinshi toqsanynda bundaı úleskerlerdiń qatysýyndaǵy problemaly nysandardyń sany 450-di quraǵan jáne ondaǵy úleske qatysýshylardyń sany 62 myń 889 adam edi. «Qazirgi jaǵdaı boıynsha Astanada 12 myń 181 úleskerlerdiń qatysýyndaǵy 59 nysan, Almatyda 7 myń 657 úleskerdiń qatysýyndaǵy 28 nysan, Aqmola oblysynda 2 myń 197 úleskerdiń qatysýyndaǵy 2 nysan, Almaty oblysynda 2 myń 489 úleskerdiń qatysýyndaǵy 9 nysannyń jumysyn aıaqtaý kózdelip otyr», dedi S.Nokın.
