Elimizde 2014 jylǵa qaraı normatıvten tys ysyraptardy tolyq joıý kútilýde
ASTANA. Qyrkúıektiń 8-i. QazAqparat /Ernur Aqanbaı/ - Qazaqstandaǵy 2010-2014 jyldarǵa arnalǵan tarıftik saıasat jónindegi salalyq baǵdarlama sheńberinde elimizde 2014 jylǵa qaraı normatıvten tys ysyraptardy tolyq joıý kútilýde. Bul týraly búgin Úkimet otyrysynda Tabıǵı monopolııalardy retteý agentiginiń tóraǵasy Nurlan Aldabergenov aıtty.
Onyń sózine qaraǵanda, osydan baryp ekonomıkalyq tıimdilik elektr jelilerinde - 671,8 mln. kVt/saǵatty nemese 4,4 mlrd. teńgeni, jylý jelilerinde - 3,8 mln. Gkaldy nemese 8,8 mlrd. teńgeni, sý sharýashylyǵy jelilerinde - 105,0 mln. tekshe metrdi nemese 0,65 mlrd. teńgeni quraıtyn bolady. «Baǵdarlamanyń maqsattarynyń biri - elektr energııasyn jáne sýdy únemdeýge negizdeledi, oǵan qol jetkizetin qural - saralanǵan tarıfterdi engizý bolyp tabylady», dedi N. Aldabergenov.
Bul rette búgingi kúnge respýblıkada elektr energııasyna saralanǵan tarıfter tutyný kólemine qaraı jáne táýlik zonalary boıynsha qoldanylatynyn aıtqan ol: «Osy jumysty júrgizý nátıjesinde elektr energııasyn shamamen 150 mln. kvt/saǵatqa, otyndy shamamen 30 myń tonna kómirge únemdeý, lastaýshy zattar shyǵaryndylaryn shamamen 13,5 myń tonnaǵa tómendetý, sondaı-aq tutynýshy qarajattaryn shamamen 2,1 mlrd. teńgege únemdeý kózdelýde», dedi.
