Elimizde 2010 jyly temir jol salasyndaǵy tarıfterdi 17,6 paıyzǵa, al 2011 jyldan bastap jyl saıyn 15 paıyzǵa kóterý kózdelýde
ASTANA. Jeltoqsannyń 1-i. QazAqparat /Ernur Aqanbaı/ - Elimizde temir jol kóligi salasyndaǵy tarıfterdi 2010 jyly 17,6 paıyzǵa kóterý josparlanyp otyr,
dep habarlaıdy QazAqparat.
«Temir jol salasynyń ınvestıtsııalyq suranysyn qamtamasyz etý úshin eń aldymen 2010 jyly tarıfterdi 17,6 paıyzǵa, 2011-2014 jyldary jyl saıyn 15 paıyzǵa kóterý qajet», dedi búgin Úkimet otyrysynda Kólik jáne kommýnıkatsııa mınıstri Ábilǵazy Qusaıynov.
Onyń aıtýynsha, ekinshiden 160 mlrd. teńge mólsherindegi respýblıkalyq bıýdjetiń qarjysy esebinen 2020 jylǵa deıin jolaýshylardyń jyljymaly quramyn jańǵyrtý qajet. Úshinshiden, 2010 jyldan bastap vagon quramdaýyshtar boıynsha, 2013 jyldan bastap tasymaldaý qyzmeti boıynsha tarıfterdi qaıtadan retteýdi júzege asyrý qajet. Tórtinshiden, 2013 jyldan bastap jolaýshylar tasymalyn 100 paıyz sýbsıdııalaý kerek. Bul rette ishinara memlekettik sýbsıdııalaý 2010 jyly 16,7 mlrd. teńge, 2011 jyly 19,4 mlrd. teńge, 2012 jyly 22,2 mlrd. teńgeni quraıdy. Besinshiden, magıstraldi temir jol jelilerine shekteýsiz qol jetkizýge jol ashý kerek. Bul rette atalǵan maqsattarǵa qol jetkizý úshin salaǵa maqsatty modeldi engizýde Úkimet deńgeıinde jáne «Qazaqstan temir joly» kompanııasy deńgeıinde sheshimder qabyldaý kózdelip otyr.
