Elimizde 2010 jylǵy qyrkúıektegi bir qyzmetkerdiń ortasha aılyq ataýly jalaqysy 78 myń 805 teńgeni qurady
ASTANA. 12 qarasha. QazAqparat - Qazaqstanda 2010 jylǵy qyrkúıektegi bir qyzmetkerdiń ortasha aılyq ataýly jalaqysy 78 myń 805 teńgeni qurady jáne ótken jylǵy tıisti aımen salystyrǵanda 17,0 paıyzǵa, naqty kóriniste - 9,6 paıyzǵa ósti.
QR Statıstıka agenttiginiń taratqan málimeti boıynsha, salalyq qurylymda eń joǵary jalaqy burynǵydaı qarjy jáne saqtandyrý qyzmetinde saqtalyp otyr, bul salalaǵylar 148,4 myń teńge jalaqy alady, bul ortasha respýblıkalyq deńgeıden 1,9 esege asady. Al kásibı, ǵylymı jáne tehnıkalyq qyzmettegiler - 145,9 myń teńge (1,8 ese), ózge de qyzmetter túrlerin usynýshylar - 127,3 myń teńge (1,6 ese) jalaqy alady. Eń tómengi jalaqy aýyl, orman jáne balyq sharýashylyǵyndaǵy qyzmetkerlerde saqtalýda, bul salalardaǵylardyń aılyq tabysy orta eseppen 47,5 myń teńge, bul el boıynsha kórsetkishten orta eseppen 39,7 paıyzǵa az.
Óńirlik bóliniste eń joǵary jalaqy Atyraý oblysynda saqtalýda - 149,4 myń teńge, bul ortasha respýblıkalyq kórsetkishten 1,9 esege asady. Jambyl oblysynda onyń shamasy 52,5 myń teńgeni qurady, bul el boıynsha ortasha deńgeıden 33,4 paıyzǵa tómen.
