Elimizde 2010-2014 jyldary 2 mln. sharshy metr shamasynda memlekettik turǵyn úı salynady - S. Nokın
ASTANA. Qyrkúıektiń 8-i. QazAqparat /Ernur Aqanbaı/ - Elimizde 2010-2014 jyldary 2 mln. sharshy metr shamasynda memlekettik turǵyn úı salý josparlanyp otyr. Bul týraly búgin Úkimet otyrysynda Qurylys jáne turǵyn úı-kommýnaldyq sharýashylyq isteri agenttiginiń tóraǵasy Serik Nokın aıtty.
Onyń sózine qaraǵanda, sonyń ishinde 1,1 mln. sharshy metr kredıttik turǵyn úı jáne 864,2 myń sharshy metr jalǵa beriletin turǵyn úı salynbaq. «2011 jyldan bastap «Qazaqstannyń Turǵyn úı qurylys jınaq bankiniń» qatysýymen jergilikti atqarýshy organdar men jeke ınvestorlar arqyly turǵyn úıdi salý jáne satý shemasy boıynsha kredıttik turǵyn úı salý kózdelip otyr. Іlki jobalardy iske asyrý úshin Respýblıkalyq bıýdjettik komıssııasynda Agenttiktiń 2011 jyly 20,8 mlrd. teńge bólý týraly ótinimine qoldaý kórsetildi. Іlki jobalardy iske asyrý qorytyndylary boıynsha Turǵyn úı qurylys jınaq banki salynǵan turǵyn úıge tólem qabileti bar suranysty qamtamasyz etetin salymshylardyń pýlyn qalyptastyrady. Bul jeke qurylys salýshylardyń qyzyǵýshylyǵyn, Turǵyn úı qurylys jınaq banki salymshylary sanynyń ósýin qamtamasyz etedi, osynyń nátıjesinde turǵyn úı qurylysynyń kólemi ósedi», dedi S. Nokın. .
S. Nokın osy mehanızimmen qatar, Agenttik «ASI» Investıtsııalyq-qurylys kompanııasymen» birlesip qurylys salýdyń jańa shemasyn jáne jeke ınvestorlardyń turǵyn úı satý shemasyn ázirlegenin atap ótti. «Ákimdikterde kezekte turǵan áleýmettik jaǵynan qorǵalatyn azamattar úshin memlekettik jalǵa beriletin turǵyn úı salynýda. Jalǵa beriletin turǵyn úı qurylysyn memlekettik qoldaý kólemi is júzinde burynǵy deńgeıde saqtalady», dedi ol. Onyń pikirinshe, salynyp jatqan turǵyn úıdi der kezinde paıdalanýǵa berýdi qamtamasyz etetin negizgi faktor - turǵyn úı qurylysy salynatyn aýdandarda tıisti ınjenerlik-kommýnıkatsııalyq ınfraqurylymdardyń bolýy. Respýblıkalyq bıýdjet komıssııasynyń otyrysynda baǵdarlamanyń jobasyna sáıkes 2011-2012 jyldary ınjenerlik-kommýnıkatsııalyq ınfraqurylymdardy damytýǵa 10 mlrd. teńge, keıingi jyldarǵa jyl saıyn 30 mlrd. teńgeden bólý máselesi qoldaý tapqan.
