Elimizde 2009 jylǵy qazanda halyqtyń jan basyna shaqqandaǵy ortasha ataýly aqshalaı tabystary 34 myń 794 teńgeni qurady
ASTANA. Jeltoqsannyń 10-y. QazAqparat /Ernur Aqanbaı/ - Elimizde 2009 jylǵy qazanda halyqtyń jan basyna shaqqandaǵy ortasha ataýly aqshalaı tabystary aldyn ala derekter boıynsha 34 myń 794 teńgeni qurap, ótken jylǵy tıisti kezeńmen salystyrǵanda 9,2 paıyzǵa artty.
Naqty aqshalaı tabystary 3,2 paıyzǵa ósti. Bul týraly QazAqparat QR Statıstıka agenttigine silteme jasap habarlaıdy.
Agenttiktiń málimetinshe, 2009 jylǵy qazanda jan basyna shaqqandaǵy ortasha aqshalaı tabystardyń kólemi boıynsha Atyraý oblysy, Astana jáne Almaty qalalary aldyńǵy qatardan oryn alyp otyr, osy kórsetkish ortasha respýblıkalyq deńgeıdi 1,8-2,3 esege arttyrdy. «2009 jylǵy qazanda tabystary eń tómen óńirler qatarynda Ońtústik Qazaqstan jáne Almaty oblystary belgilendi, osy óńirlerde halyqtyń tabys mólsheri respýblıkalyq deńgeıden ortasha 74,3 paıyzdy jáne 81,1 paıyzdy qurady. Sonymen birge, halyqtyń naqty aqshalaı tabystarynyń eń kóp ósý qarqyny Ońtústik Qazaqstan jáne Jambyl oblystarynda belgilendi», delingen Agenttiktiń búgin taratqan habarlamasynda.
2009 jylǵy qazanda óńirler boıynsha ataýly aqshalaı tabystardyń eń joǵary jáne eń tómen mólsherleri arasyndaǵy qatynas 3,1 eseni qurap otyr. Bul kórsetkish 2008 jylǵy qazanda 3,2 ese bolǵan.
