Elimizde 20 402 óndiristik qaýipsizdik talaptaryn buzý faktisi anyqtaldy

NUR-SULTAN. QazAqparat – Bıyl ónerkásipterdegi qaýipsizdik sharasyn baqylaý maqsatynda 1 myńnan astam tekserý júrdi. Nátıjesinde 20 myńnan astam óndiristik qaýipsizdik talaptarynyń buzylý jaǵdaıy anyqtaldy. Bul týraly QR Tótenshe jaǵdaılar mınıstrligi ónerkásiptik qaýipsizdik komıtetiniń tóraǵasy Nyǵmedjan Maqajanov málim etti, dep habarlaıdy QazAqparat tilshisi.

«Sońǵy 5 jyldaǵy taldaý nátıjesi kórsetkendeı, óndiristik jaraqat alý negizinen kómir jáne taý-ken salasyna tıesili. Bul respýblıka boıynsha qaýipti óndiristik obektilerdegi jazataıym oqıǵanyń 30%-dan astamyn quraıdy. Sondyqtan da ónerkásipterdegi qaýipsizdik sharasy kúsheıtip, quqyqtyq tártipti nyǵaıtý boıynsha jumysty jalǵastyrý qajet», - deıdi ol.

Onyń aıtýynsha, bıyl jyl basynan beri ónerkásip oryndarynda 1 306 tekserý júrgizildi.

«Onyń ishinde erekshe tártip boıynsha 713 jáne 593 jospardan tys tekserý júrdi. Osylaısha barlyǵy 16 385 obekt tekserýden ótti. Inspektorlardyń mindeti ónerkásiptik qaýipsizdik talaptaryn buzý jaǵdaılaryn anyqtaý. Sonymen qatar qaýipti óndiristik obektilerde apattyń aldyn alý. Tekserý qorytyndysynda ónerkásiptik qaýipsizdik talaptaryn buzý boıynsha 20 402 fakti anyqtaldy», - deıdi ol.

Buǵan deıin habarlaǵanymyzdaı bıyl jyl bastalǵaly ónárkásip oryndarynda 6 adam qaıtys boldy.

Sondaı-aq, brıfıngide qaýipsizdik talaptaryn óreskel buzǵan 582 ónerkásip jumysynyń toqtatylǵany aıtyldy.