Elimizde 2 trln teńgeniń 110 jobasy iske asyrylýda

NUR-SULTAN. QazAqparat – Indýstrııalandyrý kartasy aıasynda jalpy somasy 2 trln teńgege 110 joba iske asyrylyp jatyr. Bul týraly búgin Úkimet otyrysynda QR Indýstrııa jáne ınfraqurylymdyq damý mınıstri Beıbit Atamqulov aıtty, dep habarlaıdy QazAqparat tilshisi.

«Indýstrııalandyrý kartasy aıasynda jalpy somasy 2 trln teńgege 110 joba iske asyrylyp jatyr. Olarda 12 myńnan astam jańa turaqty jumys orny ashylady. Óńdeý ónerkásibin damytýdy zańnamalyq qamtamasyz etý maqsatynda Memleket basshysynyń tapsyrmasy boıynsha Úkimet ótken jyly «Ónerkásiptik saıasat týraly» zań jobasyn ázirledi. Qazirgi ýaqytta zań jobasy Parlament Májilisiniń qaraýynda», - dedi óńdeý ónerkásibin damytý jaıynda baıandaǵan mınıstr.

Onyń atap ótýinshe, Memleket basshysynyń óńdeý ónerkásibi kólemin 2025 jylǵa qaraı 1,5 esege arttyrý jónindegi tapsyrmasyn Indýstrııa mınıstrligi jergilikti atqarýshy organdarmen birlesip oryndaıtyn bolady.

«Qazirgi ýaqytta óńirler men salalar boıynsha 2025 jylǵa deıin óńdeý ónerkásibi óndirisiniń kólemi boıynsha josparly kórsetkishterdi aıqyndadyq. Oǵan qol jetkizý úshin óńdeýshi salaǵa jaýapty negizgi mınıstrlikter oblystardyń jáne respýblıkalyq mańyzy bar qalalardyń ákimdikterimen memorandým jasaýy oryndy bolady dep sanaımyz. Jalpy, júrgizilip jatqan sharalar elimizdiń óńdeý ónerkásibinde josparlanǵan kórsetkishterge qol jetkizip, ındýstrııalyq saıasattyń tıimdi iske asyrylýyna eleýli yqpal etedi», - dedi Beıbit Atamqulov.