Elimizde 2 myńǵa jýyq mektepte sport zaly joq – Mektep sporty federatsııasy
«Qazaqstandaǵy sport úıirmeleri oqýshylardy álemniń ortasha kórsetkishimen salystyrǵanda 4 ese az qamtıdy. Onyń ústine 1970 mektepte sport zaly joq. 1991 jyldan beri elde 9 myń sporttyq qurylym men bilim uıymynyń nysany salyndy. Al 1998 jyldan beri olardyń taǵy 2 myńnan astamy boı kóterdi. Qazir onyń 31 paıyzy qanaǵattanarlyq jaǵdaıda emes. Aýyl oqýshylarynyń sporttyq qurylym boıynsha suranysy 30 paıyzǵa ǵana qanaǵattandyryldy. Sol sebepti balalar sportyn damytamyz desek, osy máselelerge kóbirek kóńil bólýimiz kerek», - dedi Álııa Túsipbekova OKQ-da ótken baspasóz máslıhatynda.
Sonymen birge onyń aıtýynsha sporttyń naqty túrleri boıynsha jattyǵýlardy uıymdastyrý úshin bilikti kadrlar men qajetti quraldar jetispeıdi.
«Aýyl mektepterinde sport dobyna deıin tapshy. Bıyl Mektep sporty federatsııasy osyndaı 1000 mektepke basketbol, voleıbol jáne fýtbol doptaryn taratty. Kelesi jyly bul jumys jalǵasyn tabady. Memleket balalar men jasóspirimderge qaıtarymsyz sıpatta dene shynyqtyrý men sportpen aınalysý jumysyn uıymdastyrý qyzmetterin tolyǵymen usynyp jatqan joq», - dedi spıker.
Álııa Túsipbekova Mektep sporty federatsııasy aımaqtardaǵy bilim uıymdaryna tıisti hat joldaǵanyn habarlady.
«Ókinishke qaraı, Almaty men Nur-Sultan qalasy ǵana bul suranysymyzǵa oń jaýabyn berdi. Aqtóbe oblysy jańashyldyq kerek emes dep hatty qaraýsyz qaldyrdy. Jambyl oblysy da sol. Balalardy sportqa tartý úshin konstrýktıvti sheshimder kerek. Bárin basshylardan bastaǵan durys. Bul baǵytta jumys júrgizilip jatyr desek te, jetkilikti deńgeıde dep aıta almaımyz», - dep túıdi ol.
