Elimizde 2 esirtki zerthanasy men hımııalyq prekýrsorlardyń iri qoımasy joıyldy – QR UQK

ASTANA. QazAqparat - 2023 jylǵy 12 jáne 14 shildede Almaty qalasynda Ulttyq qaýipsizdik komıteti ótkizgen is-sharalar nátıjesinde 2 esirtki zerthanasy men hımııalyq prekýrsorlardyń iri qoımasy joıyldy, dep habarlaıdy QazAqparat vedomstvonyń baspasóz qyzmetine silteme jasap.

10 keliden asa «mefedron» sıntetıkalyq esirtki, 15 tonnaǵa jýyq prekýrsorlar, sonymen qatar 4-5 esirtki zerthanasyn iske qosýǵa múmkindik beretin arnaıy quraldar anyqtalyp, tárkilendi.

Esirtki ázirleý ústinde respýblıkamyzdyń 4 azamaty ustalyp, olarǵa qatysty sot sanktsııasymen qamaýǵa alý túrindegi bultartpaý sharasy qoldanyldy.

Bul faktiler boıynsha sotqa deıingi tergep-tekserý júrgizilýde.

UQK bıylǵy jyl basynan beri 24 esirtki zerthanasyn, 20 halyqaralyq jáne 23 aımaqtyq esirtki arnalaryn joıyp, 780 keli sıntetıkalyq esirtki men 68 tonnadan asa prekýrsorlardy tárkiledi.

Esirtki jáne psıhotroptyq zattar men olardyń analogtarynyń zańsyz aınalymyna, satylýyna, saqtalýyna, ázirlenýine, ósirilýine, óńdelýine jáne satyp alynýyna qatysy bar qylmystar zań talaptaryna saı 3 jyldan 20 jylǵa deıingi merzimge bas bostandyǵynan aıyrýǵa jazalanady.