Elimizde 2,7 mln adamnyń jumys statýsy anyqtalmaǵan - Nurjan Áltaev
QOSTANAI. QazAqparat - Ózin-ózi jumyspen qamtyǵan halyqtyń qyzmetin zańdastyrý jónindegi Jol kartasyn iske asyrý máseleleri boıynsha Qostanaı oblysynda QR Parlamenti Senatynyń kóshpeli otyrysy ótti, dep habarlaıdy QazAqparat tilshisi.
QR Eńbek jáne halyqty áleýmettik qorǵaý vıtse-mınıstri Nurjan Áltaevtyń aıtýynsha, Jol kartasyn iske asyrý úsh baǵyt boıynsha júrgiziledi.
«Aldymen, halyqtyń jumys statýsyn naqtylaý sharalary qolǵa alyndy. Jyl basynan beri memlekettik organdardyń derek qoryndaǵy 2,7 mln azamattyń jumys statýsy anyqtalmaǵan. Búginde 607 myń adamnyń statýsy naqtylandy. Onyń ishinde 193 myń jumysker eńbek shartyn jasap, mindetti zeınetaqy jarnalaryn aýdardy. Sondaı-aq, 12 myń kásipker ózderiniń qyzmetterin tirkese, 36 myń adam jumyspen qamtýǵa járdemdesý sharalaryna tartyldy. Ekinshi baǵyt halyqtyń jumyspen qamtylýyn zańdastyrý boıynsha júredi. Sondaı-aq, óńirlerden qurylǵan shtabtar ózin-ózi jumyspen qamtyǵandardy nátıjeli jumysqa ornalastyrý baǵytynda jumys isteıdi», - dedi vıtse-mınıstr.
Resmı statıstıka boıynsha elimizde 400 myńnan astam jumyssyz bar. Nurjan Áltaevtyń sózinshe, ózin-ózi jumyspen qamtyǵan adamdardy jumyssyz dep esepteýge bolmaıdy.
«Jalpy, bizde ózin-ózi jumyspen qamtyǵandar jumyssyzdar qataryna jatqyzylady degen teris túsinik qalyptasqan. Shyn máninde bulaı emes. Olardyń kóbi - ózderin-ózderi jumyspen qamtyǵan, bıznespen, kásipkerlikpen aınalysatyn jaǵdaıy jaqsy adamdar. Biraq, árıne, olardyń ishinde de turaqty tabysy joq adamdar bar. Mundaı topty tıimsiz ózin-ózi jumyspen qamtyǵandar deýge bolady», - dedi N.Áltaev.
Qostanaı oblysy ákiminiń orynbasary Marat Júndibaev aıtqandaı, turǵyndardyń jumys statýsyn naqtylaý jónindegi óńirlik shtab quryldy jáne jol kartasy bekitildi. Sonymen qatar, eńbek ónimdiligin arttyrý jáne jappaı kásipkerlikti damytý baǵdarlamasy boıynsha bıyl oblysqa 5 mlrd teńgeden astam qarjy bólindi.
2018 jyly Qostanaı oblysynda 66,2 myń adamnyń jumys statýsy naqtylanbaǵan. Onyń 32 myńy Qostanaı qalasyna tıesili. Al Rýdnyı qalasynda 13 myń adam kásibin rastaıtyn qujatqa ıe emes. Bıylǵy keshendi jospar boıynsha 22,4 myń adamdy qamtý josparlanǵan.
