Elimizde 2,5 myń áskerılerdiń qatysýymen brıgadalyq-taktıkalyq oqý-jattyǵýlary bastaldy
Qorǵanys mınıstrliginiń málimetinshe, oqý-jattyǵý ótkiziletin aýmaqta barlyǵy eki jarym myńnan astam áskerı kontıngent shoǵyrlandy.
Bul oqý-jattyǵýdyń ereksheligi - oqý-jattyǵý jumystary daǵdyly dala tósinde ǵana emes, qosymsha qıynshylyqtar týdyratyn belgisiz taýly aımaqta uıymdastyrylýynda.
Brıgadalyq-taktıkalyq oqý-jattyǵýlardyń eń kúrdeli satylarynyń biri túngi urys qımyldary bolmaq. Qarańǵylyqty paıdalana otyryp, shartty túrdegi jaý jaǵy kenet shabýyldaýy múmkin. Mundaıda komandırler bólimshelerdi saýatty basqaryp, olardyń ózara is-qımyldaryn uıymdastyra bilýi qajet. Osy sebepten olardan joǵary kásibık pen jaqsy áskerı sheberlik talap etiledi. Jaýyngerlik áreketterdi ótkizýdiń tabystylyǵy komandırlerge baılanysty.
Brıgadalyq oqý-jattyǵý sheńberinde barlaý bólimderiniń taktıkalyq-arnaıy jattyǵýy ótkiziledi. Olar túngi shabýyl men torýyldaýdy jasap, jaýdyń is-qımyldaryn ejikteıdi. Osylaısha oqý-jattyǵýdyń jaǵdaıy shynaıy soǵys áreketterine barynsha uqsas bolady.
Oqý-jattyǵýdyń belsendi satysynda daǵdarysty aýdanda arnaıy operatsııaǵa tán birqatar taktıkalyq oqıǵalar ótkiziledi. Olardyń ishinde áskerı kolonnalardy súıemeldeý, 
asa mańyzdy obektilerdi kúzetý, jaýdyń dıversııalyq kúshterimen kúresý, jaýdyń qarýly quramalaryn qorshaý jáne joıý boıynsha áskerlerdiń is-áreketteri pysyqtalady.
Oqý-jattyǵý barysynda «Ońtústik» óńirlik qolbasshylyǵy bólimderi men quramalarynyń búkil shtattyq tehnıkasy: jaıaý ásker jaýyngerlik mashınasy, bronetransporterler, tankter, artıllerııalyq qondyrǵylar, atqysh qarý-jaraqtar qoldanylady. Іs-sharaǵa maıdan jáne armııa avıatsııasynyń qatysýy josparlanǵan. Oqý-jattyǵýdy «Ońtústik» óńirlik qolbasshylyǵy áskerleriniń qolbasshysy general-maıor Talǵat Qoıbaqov basqarady.
Osy kúnderi Mátibulaq polıgonynda brıgadalyq-taktıkalyq oqý-jattyǵýyna daıarlyq aıasynda vzvodtardyń jaýyngerlik atystary bastaldy.