Elimizde 195 lokomotıv pen 56 jolaýshylar vagonyn paıdalanýǵa ýaqytsha tyıym salyndy - KKM

ASTANA. 14 tamyz. QazAqparat - QR Kólik jáne kommýnıkatsııa mınıstrligi temirjol salasyndaǵy kompanııalardyń qaýipsizdik talaptaryn oryndaýyn tekserdi. Bul týraly atalǵan vedomstvonyń baspasóz qyzmetinen habarlady.

Mınıstrliktiń aqparatyna sáıkes, Qaraǵandy oblysy boıynsha «Saryarqa» aımaqaralyq kóliktik baqylaý ınspektsııasy «Lokomotıv» AQ-nyń paıdalaný lokomotıv deposynyń Jańaarqa bóliminde kólik zańnamasynyń talaptaryn qanshalyqty saqtap otyrǵanyna tekserdi. Shara barysynda 12 lokomotıvke ornatylǵan jyldamdyq eseptegish quraldarynyń akkredıtatsııalyq attestaty joq zerthanalarda synaqtan ótkenin anyqtady.

Al, «Lokomotıv» AQ-nyń Aqtóbe paıdalaný deposynyń bóliminde qosymsha tejegish qurylǵysymen jabdyqtalmaǵan lokomotıvterdi qoldaný faktileri anyqtaldy. Sondaı-aq, Oral, Aqtoǵaı lokomotıv depolary men Mataı jáne Dostyq stansalarynyń depolarynda merzimdik tehnıkalyq tekseristen ótý merziminiń buzylǵany da belgili boldy.

Budan basqa, «Semeı kólik kompanııasy»JShS, «Arselor Mıttal Temirtaý» AQ, «Silizium Kazakhstan» JShS jáne «Evrazıan Fýds» AQ-da tekserý júrgizý barysynda 39 lokomotıvtiń jyldamdyq ólshegishiniń, kompressorynyń, júris bóligi tartpasynyń, pnevmatıkalyq jáne qol tejegishteriniń aqaýy bary anyqtaldy. Sondaı-aq, qum berý júıesi men manevrlik radıostansasy joq bolyp shyqty.

Aǵymdaǵy jyldyń 7 aıynda kóliktik baqylaý komıtetiniń qyzmetkerleri 990 temirjol kóligi mekemesinde tekserý júrgizdi. Tekserý barysynda normatıvtik quqyqtyq aktilerdiń talaptaryn buzýdyń 21 793 faktisi anyqtaldy, onyń ishinde 8886 buzýshylyq «QTJ» UK» AQ-nyń bólimderinde tirkelip otyr. Tekserý qorytyndysynda anyqtalǵan buzýshylyqtar joıylmaıynsha 195 lokomotıvti paıdalanýǵa tyıym salyndy, onyń 75-i «Lokomotıv» AQ-nyń jeke menshigi bolsa, qalǵan 120 birlik temirjol kóligi mekemelerine tıesili. Budan basqa, 56 jolaýshylar vagony men jolaýshylar vagonyna teńdestirilgen vagondardy paıdalanýǵa tyıym salyndy.

2012 jyly atalǵan merzimde kóliktik baqylaý organdary 1195 temirjol kóligi uıymdarynda tekserý júrgizilgen bolatyn. Qorytyndysynda normatıvtik quqyqtyq aktilerdiń talaptaryn buzýdyń 21 650 faktisi anyqtalǵan bolatyn. Sonyń ishinde 5992 buzýshylyq «QTJ»UK» AQ-nyń bólimderinde anyqtaldy.