Elimizde 19 jylý elektr ortalyǵy qyzyl aımaqta tur
ASTANA. QazAqparat – Elimizde 19 jylý elektr ortalyǵy qyzyl aımaqta tur. Bul týraly QR Premer-Mınıstri Álıhan Smaıylovtyń Senat depýtattarynyń saýalyna bergen jaýabynda aıtylǵan, dep habarlaıdy QazAqparat tilshisi.
«Búgingi tańda elde 37 jylý elektr ortalyǵy jumys isteıdi. Onyń 12-si – kommýnaldyq menshikte (Astana, Aqtaý, Semeı, Qostanaı, Kentaý, Oral, Arqalyq, Shahtınsk, Qyzylorda, Taraz qalalarynda), úsheýi – kvazımemlekettik («AlES» AQ) jáne 22-si – jeke menshikte. 25 jylý elektro ortalyǵyndaǵy negizgi otyn – kómir, 11 jylý elektr ortalyǵynda – gaz jáne mazýttaǵy bir JEO bar. 37 JEO-da 190 bý qazandyǵy, 41 sý jylytý qazandyǵy, 132 bý týrbınasy jáne 5 gaz týrbınasy jumys isteıdi. Energetıka mınıstrligi 37 JEO-nyń tehnıkalyq jaı-kúıine taldaý júrgizip, olardy táýekel toptary boıynsha sanattady jáne birinshi kezektegi is-qımyl josparlaryn ázirledi. Máselen qyzyl aımaqqa (joǵary táýekel dárejesi) 19 JEO, sary (ortasha táýekel dárejesi) 11 JEO jáne jasyl (tómen táýekel dárejesi) 7 JEO kirdi», - delingen Úkimet basshysynyń jaýabynda.
Premer-Mınıstrdiń jaýabyna qosymsha usynylǵan anyqtamaǵa sáıkes, táýekel aımaǵyna myna qalalardaǵy JEO-lar kiredi:
Arqalyq - 1, Kentaý - 1, Qyzylorda - 1, Oral - 1, Stepnogorsk - 1, Temirtaý - 2, Pavlodar - 1, Aqtaý - 1, Shahtınsk - 1, Rıdder - 1, Rýdnyı - 1, Balqash - 1, Jezqazǵan - 1, Óskemen - 1, Petropavl - 1, Semeı - 1, Ekibastuz - 1, Taraz - 1; sary táýekel aımaǵyndaǵylar: Almaty - 2, Pavlodar - 1, Aqtaý - 1, Qaraǵandy - 2, Tekeli - 1, Shymkent - 1, Qostanaı - 1, Atyraý - 1; jasyl táýekel aımaǵyndaǵylar Almaty - 1, Oral - 1, Pavlodar - 1, Astana - 1, Aqtóbe - 1, Astana - 1.
