Elimizde 18,5 myń nashaqor esepte tur

NUR-SULTAN. QazAqparat – Elimizde 18,5 myń nashaqor esepte tur. Bul týraly QR ІІM Esirtki qylmysyna qarsy is-qımyl departamenti basqarmasynyń bastyǵy Baqytjan Ámirhanov málim etti, dep habarlaıdy QazAqparat tilshisi.

«Birikken ulttar uıymynyń málimeti boıynsha sońǵy 10 jylda esirtkige táýeldi adamdardyń sany 22 paıyzǵa ósken. Álemde shamamen 275 mln nashaqor adam bar. Esirtki jyl saıyn 500 myńnan astam adamnyń ólimine sebepshi bolyp otyr. 19 mln halqy bar Qazaqstan úshin esirtkige elitýdiń tipti, eleýsiz kórsetkishi ulttyq qaýipsizdikke aıtarlyqtaı qater tóndiredi. Densaýlyq saqtaý mınıstrliginiń málimetterine súıensek elimizde 18,5 myńnan astam nashaqor tirkeýde tur. Onyń ishinde 1,5 myńy - áıel, al 94-i - jasóspirim», - dedi ol mınıstrliktiń baspasóz alańynda ótken brıfıng barysynda.

Biraq, Іshki ister mıınstrliginiń ókili bul naqty tirkeýde turǵandardyń sany ekendigin aıtady.

«Al shyn ahýalǵa keletin bolsaq, naýqastar sany birneshe ese artyp jyǵylady. Qazaqta «Jalǵyzdyń úni shyqpas, jaıaýdyń shańy shyqpas» degen maqal bar. Sol sııaqty tek quqyq qorǵaý organdarynyń ǵana kúshimen álemdi jaýlaǵan bul indetti jeńe almaımyz. «Jumyla kótergen júk jeńil» demekshi, barlyq múddeli quzyrly memlekettik organdardyń, jergilikti atqarýshy organdardyń, qoǵam ókilderiniń, memlekettik emes uıymdardyń, jalpy jurtshylyqtyń birlesken kúsh-jigeri jumyldyrylýy abzal. Osy oraıda Úkimet basshylyǵymen arnaıy profılaktıkalyq is-sharalar jospary bekitilip, joǵaryda atalǵan barlyq organdar men uıymdardyń qatysýymen el boıynsha árbir jasóspirimge jáne olardyń ata-analaryna esirtkiniń zııany týraly túsindirý maqsatynda keń aýqymdy is-sharalar ótkizilip jatyr», - dedi Baqytjan Ámirhanov.