Elimizde 172 órt deposy qurylysynyń qajettiligi týyndap otyr - QR TJM
ASTANA. 11 shilde. QazAqparat - 10 jylda merziminde jyl saıyn kem degende 15 órt sóndirý deposynyń qurylysyn qarastyrý kerek.
Bul týraly búgin Astanada QR Tótenshe jaǵdaılar mınıstrliginiń ujymy men Májilis depýtattarynyń kezdesýi barysynda Órtke qarsy qyzmet komıtetiniń tóraǵasy Serik Áýbákirov málim etti.
«Sońǵy 7 jylda órt sóndirý depolarynyń 5 ǵımaraty paıdalanýǵa berildi. Onyń ishinde ekeýi Astana aýmaǵynda, qalǵan úsheýi Býrabaı kýrorttyq aımaǵynda jumys isteýde. Alaıda, búginde 5 myń jáne odan da kóp turǵyndary bar eldi mekender úshin kem degende qosymsha 172 órt depolarynyń qurylysy qajet. Bul turǵyda 10 jyl merziminde jyl saıyn mınıstrliktiń bıýdjetinde kem degende 15 deponyń qurylysyn qarastyrý kerek»,-dedi ol.
Komıtet tóraǵasynyń sózine qaraǵanda, bir deponyń qurylysyna ortasha eseppen 900 mln. teńge jumysalatynyn eskergende, bul baǵytta jyl saıyn qajetti qarjylandyrý kólemi 13,5 mlrd. teńge bolýy tıis.
Atap aıtqanda, bıyl órt sóndirý depolarynyń qurylysyna 1,9 mlrd. teńge kólemindegi qarjyǵa qoldaý jasalǵan. Onyń ishinde 232,8 mln. teńgesi Astana qalasynda jáne Almaty men Atyraý oblystaryndaǵy 3 deponyń qurylysyn aıaqtaýǵa baǵyttalmaq.
Aıta keteıik, búginde órt sóndirý men birinshi kezektegi apattyq-qutqarý jumystaryn júrgizý úshin respýblıkada 408 órt depolary bar.
