Elimizde 16 jastaǵy qyzdarǵa abort jasatýǵa ruqsat berile me
Ótken aptada QR Densaýlyq saqtaý mınıstrligi kámelettik jasqa tolmaǵan qazaqstandyqtardyń 16 jastan bastap ata-ana kelisiminsiz medıtsınalyq qyzmet tutynýǵa, onyń ishinde abort jasatýǵa ruqsat berýdi usynǵan edi. Mınıstrliktiń pikirinshe, bul erte jasta bala týý sanyn azaıtýǵa kómektesedi.
QR DSM Qoǵamdyq densaýlyq saqtaý saıasaty departamentiniń dırektory Aıjan Ismaǵambetovanyń aıtýynsha, bul tastandy balalardyń azaıýyna da septigin tıgizbek.
«Josparlanbaǵan júktilik balany qorǵansyz kúıde tastap ketýdiń birden bir sebebi. Biz zańnamaǵa engizgeli otyrǵan norma osy máselelerdiń aldyn alady», - dedi Aıjan Ismaǵambetova Úkimet úıinde jýrnalısterge bergen suhbatynda.
Onyń aıtýynsha, sońǵy úsh jylda jasóspirimder arasynda júktilik pen abort statıstıkasy tómendep keledi. Degenmen, bul kórsetkish tipti Eýropamen salystyryp qaraǵanda, aıtarlyqtaı joǵary.
«Eń aldymen aqparattandyrý jáne eskertý sharalary dep túsingen jón. Búginde Qazaqstanda alǵashqy medıtsınalyq-sanıtarlyq kómek kórsetetin uıymdarda psıhoáleýmettik konsýltatsııalyq kómek kórsetetin arnaıy zańdy tulǵalar, jastar uıymdary bar. Jalpy sany 105 ortalyq bar. Biz jastardyń osyndaı ortalyqtarǵa barǵanyn, aqyl-keńes alǵanyn qalaımyz», - dep atap ótti mınıstrlik ókili.
Kámeletke tolmaǵandar úlkenderdiń kelisiminsiz abort jasatýynyń quqyqtyq jaǵyna kelsek, keri saldarlary úshin barlyq jaýapkershilikti medıtsınalyq qyzmetker arqalaıdy.
«Quqyqtyq mehanızm zańnamada kórsetilgen. Kórsetilgen medıtsınalyq qyzmettiń sapasy úshin árıne, medıtsınalyq qyzmetker jaýap beredi. Al jasóspirim medıtsınalyq qyzmet alýǵa quqyly bolady», - dep túsindirdi A. Ismaǵambetova.
Atalǵan norma ázirge talqylanyp jatyr, ol «Halyq densaýlyǵy jáne densaýlyýq saqtaý júıesi týraly» QR Kodeksinde qarastyrylǵan. Norma qabyldanǵan jaǵdaıda, jasóspirim abortqa kelisim beretin qujatqa ózi qol qoıady.