Elimizde 15 myńǵa jýyq balabaqsha mamany tapshy

ASTANA. QazAqparat – Elimizdegi balabaqshalarda 15 myńǵa jýyq tárbıeshi jetispeıdi. Bul týraly Oqý-aǵartý mınıstrliginiń «Balalardy erte damytý ınstıtýty» RMM dırektory Manara Adamova aıtty, dep habarlaıdy QazAqparat.

«Elimizde 15 myńǵa jýyq tárbıeshi jetispeıdi. Onyń birinshi sebebi jalaqynyń azdyǵyǵa qatysty bolyp tur. Sondyqtan jas mamandar bul salaǵa tartylmaı jatyr. Sonymen qatar, mektepke deıingi daıarlyq tobynda biraz tájirıbe jınaǵan tárbıeshiler mektepke aýysyp ketedi. Óıtkeni mektepte pedagogterdiń jalaqysy joǵary ekeni belgili», - dedi Manara Adamova OKQ-da ótken baspasóz máslıhatynda.

Onyń aıtýynsha, mektepke deıingi bilim berý uıymdarynda jumys istep júrgen pedagogterdiń jalaqysyn ósirý baǵytynda tıisti is-sharalar pysyqtalyp jatyr.

«Eger 5 jylǵa deıingi eńbek ótili bar jáne eń tómengi ІІ sanaty bar balabaqsha pedagoginiń ortasha aılyǵyna toqtalsaq, shamamen 164-172 myń teńgeni quraıdy. Sonymen qatar, tájirıbesi joq, jumysqa endi ǵana ornalasqan jas mamannyń jalaqysy 94-120 myń teńge aralyǵynda bolady», - dedi ınstıtýt dırektory.

Budan buryn habarlanǵandaı, mektepke deıingi bilim berý uıymdarynda 97 408 pedagog jumys istep júr. Onyń ishinde aýyldarda 41 596 (42,7%), al qalada 55 811 (57,3%) adam qamtylǵan.

Elimizdegi mektepke deıingi uıymdardyń 70 paıyzǵa jýyǵy qazaq tilinde bilim berip jatyr.

Keıingi 4 jylda balabaqsha kezeginde turǵandar sany eki esege azaıdy.