Elimizde 15-28 jastaǵy jumyssyzdyq deńgeıi 5,4 paıyzdy qurap otyr - Statıstıka
ASTANA. 4 sáýir. QazAqparat -2012 jyly Qazaqstan ekonomıkasynyń ártúrli salalarynda 8,5 mln. adam nemese 15 jáne odan joǵary jastaǵy halyqtyń 67,9 paıyzy jumyspen qamtyldy. Onyń aldyndaǵy jylmen salystyrǵanda olardyń sany 205,5 myń adamǵa (2,5 paıyzǵa) artty. Jumyspen qamtylǵandardyń jartysynan kóbi (4,4 mln. adam) - erler, 48,6 paıyzy (4,1 mln. adam) - áıelder. Bul týraly Statıstıka agenttiginen habarlandy.
Agenttik málimetterine qaraǵanda, 2012 jyly jaldamaly qyzmetkerlerdiń sany 5,8 mln. adamdy nemese jalpy jumyspen qamtylǵan halyqtyń sanynan 68,3 paıyzyn qurap, 2011 jylmen salystyrǵanda 232,3 myń adamǵa (4,2 paıyzǵa) ósti. Jumyspen qamtylǵandardyń arasynda óz betinshe jumyspen qamtylǵandardyń sany 2,7 mln.adamdy nemese 31,7 paıyzdy qurady.
Budan bólek, 2012 jyly jumyssyz halyqtyn sany 474,8 myń adamdy qurady. Jalpy jumyssyzdyq deńgeıi 5,3 paıyz (2011 jyl - 5,4 paıyz) qurady. Jumyssyz erlerdiń úlesi 39,7 paıyz, áıelderdiń úlesi - 60,3 paıyz. Al 15-24 jastaǵy jastar jumyssyzdyǵynyń deńgeıi 3,9 paıyz (2011jyly- 4,6 paıyz), 15-28 jastaǵylardiki - 5,4 paıyz (2011jyly- 6,3 paıyz) boldy.
Sonymen qatar, Eńbek jáne halyqty áleýmettik qorǵaý mınıstrliginiń jumyspen qamtý organdarynda 2012 jyldyń sońyna 34,6 myń jumyssyz resmı tirkelgen. Tirkelgen jumyssyzdar úlesi ekonomıkalyq turǵydan belsendi halyqtyń 0,4 paıyzyn (2011 jyl - 0,4 paıyz) qurady.
