Elimizde 14 jasqa deıingi balalardy turǵylyqty jeri boıynsha tirkeý alynyp tastaldy
PETROPAVL. QazAqparat – Soltústik Qazaqstan oblysynda kóshi-qon qyzmeti basqarmasynyń mamandary jyl basynan beri 4 myńnan astam adamdy tirkedi, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, óńirde eki aıda turǵylyqty mekenjaıy boıynsha 4210 adam tirkelgen. Onyń 679-y, onyń ishinde balalar bar, ýaqytsha tirkeýge turǵan. Al 22 aqpannan bastap Qazaqstannyń kóshi-qon zańnamasyna ózgerister endi. Budan bylaı 14 jasqa deıingi balalardy turǵylyqty jeri boıynsha tirkeýdiń qajeti joq.
«Engizilgen ózgeristerge saı endi 14 jasqa tolǵannan keıin ǵana bala turǵylyqty mekenjaıy boıynsha, ýaqytsha turatyn jeri boıynsha tirkeýge alynady. QR Azamattyq Kodekstiń 16 babyna sáıkes 14 jasqa tolmaǵandardyń nemese qamqorlyqtaǵy tulǵalardyń turatyn jeri bolyp olardyń zańdy ókilderiniń mekenjaıy esepteledi», - dedi SQO PD Kóshi-qon qyzmeti basqarmasynyń bastyǵy Talǵat Ábilev.
Mamandardyń aıtýynsha, memlekettik jáne jergilikti atqarýshy organdar Azamattyq Kodeksti negizge ala otyryp, memlekettik qyzmet kórsetý barysynda balanyń mekenjaıyn kórsetý úshin aqparattyq júıeden ata-anasynyń biriniń tirkelgendigi jónindegi málimetti alýy tıis.
