Elimizde 134 myńnan astam qylmystyq is elektrondy formatta tergelip jatyr

NUR-SULTAN. QazAqparat - Qazirgi kezde elimizde 134 myńnan astam qylmystyq is elektrondy formatta tergelip jatyr. Bul týraly qylmystyq isterdi elektrondyq formatta tergeý tájirıbesi jónindegi vedomstvoaralyq keńeste aıtyldy, dep habarlaıdy QazAqparat.

«Qazirgi tańda 134 myńnan astam qylmystyq is elektrondyq formatta tergelip jatyr. Bul sotqa deıingi tergeý organdarynyń óndirisindegi isterdiń jalpy sanynyń 90 paıyzdan astamyn quraıdy», - delingen Quqyqtyq statıstıka jáne arnaıy esepke alý jónindegi komıtet málimetinde.

Keńes qorytyndysy boıynsha atalǵan Komıtet tóraǵasy Sábıt Nurlybaı elektrondy formatta qylmystyq isterdi tergeýdiń tıimdiligin arttyrýǵa baǵyttalǵan birqatar usynys aıtty.

Osy oraıda qylmystyq isterdi elektrondy tergeý jumysynyń jaı-kúıine vedomstvolyq baqylaýdy arttyrý jóninde qosymsha sharalardy qabyldaý usynyldy.

Elektrondy ister boıynsha qaǵaz qujattardy talap etpeı, tek elektrondy formatta Sotqa deıingi tergep tekserý tiziliminde protsestik sheshimderdi kelisý jáne bekitý qajettiligine qadaǵalaýshy prokýrorlardyń nazary aýdaryldy.

«Bas prokýratýra Joǵarǵy sotpen birlesip elektrondy qylmystyq isterdi úzdiksiz tirkeý maqsatynda Sotqa deıingi tergep tekserý tizilimi men «Tórelik» aqparattyq júıeleriniń tehnıkalyq ózara is-qımyly boıynsha jumysty jalǵastyrady», - dep atalyp ótken komıtet aqparatynda.

Keńestiń jumysyna Іshki ister mınıstrliginiń, Bas prokýratýranyń, Joǵarǵy sottyń ókilderi, sondaı-aq bul salaǵa jaýapty qyzmetkerler qatysty.

Foto: gov.kz