Elimizde 1200 patsıent baýyr, 3000 adam búırek aýystyrý operatsııasyn kútip otyr - Jetkergen Arzyqulov

Bul týraly búgin Almatyda elimizde tuńǵysh ret jasalynǵan baýyr aýystyrý jónindegi operatsııanyń alǵashqy nátıjelerine arnalǵan baspasóz máslıhatynda A.N.Syzǵanov atyndaǵy Ulttyq ǵylymı hırýrgııa ortalyǵynyń bas dırektory Jetkergen Arzyqulov aıtty.

Esterińizge salaıyq, jeltoqsannyń 9-y kúni Qazaqstanda alǵash ret A.N.Syzǵanov atyndaǵy ulttyq ǵylymı hırýrgııa ortalyǵynda baýyr aýystyrý jónindegi eń kúrdeli operatsııa jasaldy, naqtyraq aıtqanda Shymkentten kelgen apaly-sińliler úshin (baýyrdy aýystyrýdyń ortotopıkalyq joly) baýyrdyń týysqandyq transplantatsııasy júrgizildi. Alǵashqy operatsııany atalmysh ortalyqtyń hırýrgteri Belarýstan kelgen 5 áriptes-dárigerlerimen birlesip jasady. On eki saǵatqa sozylǵan operatsııaǵa barlyǵy 50-den asa medıtsına qyzmetkerleri qatysqan bolatyn. Atap óterligi, álem tájirıbesinde, tipti atap aıtqanda Belarýs eli aldymen donorlyq transplantatsııadan bastasa, bizdiń el hırýrgtary birden baýyr aýystyrýdyń eń kúrdeli túri - týysqandyq transplantatsııa operatsııasyn jasady.

"Operatsııa sátti ótti. Elimizde alǵash ret jasalyp otyrǵandyqtan, Belarýs elinen tájirıbesi bar áriptesterimizdi shaqyrdyq. Birinshiden, transplantologııadaǵy kúrdeli operatsııalardyń biri - baýyr aýystyrý bolyp tabylady, ekinshiden, transplantologııanyń úsh túri bolsa, biz sonyń eń kúrdelisin - baýyrdyń týysqandyq transplantatsııasyn tańdap aldyq. Ondaı operatsııany júrgizý óte aýyr jáne kúrdeli, óıtkeni bir emes, eki adamnyń ómirine de jaýap beresiń. Biz úshin eń qıyny da osy boldy. Baýyryn berip otyrǵan adamnyń ólip ketý qaýpi de joǵary bolady. Qazir donor bolǵan apaıynyń hali de, apaıynyń jarty baýyryn alǵan sińlisiniń de jaǵdaıy jaqsy. Negizinen, tolyq qalpyna kelý úshin 22-23 kún qajet. Operatsııa jasaý barysynda esh tehnıkalyq qıyndyqtar bolǵan joq",-dedi Ulttyq ǵylymı hırýrgııa ortalyǵynyń baýyr hırýrgııasy bóliminiń meńgerýshisi Danııar Toqsanbaev.

Jetkergen Arzyqulovtyń aıtýynsha, álemde baýyr transplantatsııasy jıiligi jaǵynan ekinshi transplantatsııalyq operatsııaǵa jatady. "Operatsııadan soń naýqastardyń 90 paıyzy aman qalady. Operatsııanyń alǵashqy aılarynan aman qalyp, em qonbaıtyn ınfektsııalardy juqtyrmaı, baýyrdyń sińispeýi reaktsııasyna tótep bere alǵan adamdar tolyqqandy ómir súredi. Zertteý nátıjelerine qaraǵanda, búginde baýyr aýystyrǵandardyń shamamen 85 paıyzy nandaryn ózderi taýyp jeıtin halde. Keıbir áıelder bala kóterip, dúnıege deni saý sábı ákelýde. Sondyqtan ekeýi de aldaǵy ýaqytta tolyqqandy ómir súre alady", -dedi ol.

Mamandardyń aıtýynsha, transplantatsııa ót joldarynyń damymaı qalýy, baýyr men ót ózeginiń isik aýrýlary jáne baýyr tsırrozynyń asqynýy sııaqty em qonbaıtyn jaǵdaılarda jasalynady.

"Búgingi tańda búkil álemdegideı, Qazaqstanda da baýyrdyń vırýstyq, aýtoımmýndy jáne toksıkalyq zaqymdaný jaǵdaılary jıilep otyr, jyldan jylǵa onyń sany artpasa, ókinishke oraı, kemimeı jatyr. Oǵan ár túrli sebepter yqpal etýde -ekologııa, ishimdik, zııandy qyzmet orny jáne t.b., sol sebepti de baýyrdy transplantatsııalaý jyldan -jylǵa ózekti máselege aınalýda"- deıdi Danııar Toqsanbaev.

J.Arzyqulovtyń aıtýynsha, qazirgi ýaqytta Qazaqstan Respýblıkasy boıynsha alǵanda shamamen 1200 patsıent baýyr aýystyrý operatsııasyn kerek etip otyrsa, búırek aýystyrýdy 3000 adam kútip otyr.

Baspasóz máslıhaty barysynda Jetkergen Arzyqulov sonymen qatar: "Jańa jylǵa deıin júrek transplantatsııasy jasalynatyn bolady",- dep málim etti.