Elimizde 1200-ge jýyq aýyl aýyzsýmen qamtamasyz etilmegen - depýtat
«30 jyl ishinde aýyzsý máselesine 1 trln teńge jumsalǵan. Elimizde 1200-ge jýyq aýyl áli kúnge deıin aýyz sýmen qamtamasyz etilmegen. Memleket basshysy 2025 jylǵa deıin aýyzsý máselesin 100% sheshý kerek ekenin aıtty. Bul máselede sheshilmegen problemalar kóp», - deıdi Nur Otan partııasy janyndaǵy Sybaılas jemqorlyqqa qarsy is-qımyl jónindegi qoǵamdyq keńestiń tóraǵasy Erlan Saırov.
Onyń aıtýynsha, aýyzsý máselesin sheshý tetikteri mınıstrlikter jáne ákimdikter arqyly qarjylandyrylady.
«Bul baǵytta problema kóp. Mysaly, Shyǵys Qazaqstan, Almaty oblystarynda aýyldan eki shaqyrymdyq jerge sý shyǵaratyn úlken nasostar ornatylǵan. Árbir nasosqa 30-40 mln teńge ketedi. Biraq sol aýyldarǵa magıstral tartylmaǵan. Magıstral tartylǵansha ol nasostar isten shyǵyp qalady. Sonda halyqtyń qanshama mıllıard teńgesi jelge ushýda. Munyń bári jergilikti sheneýnikterdiń nemquraılyǵy. Nemquraılylyq - jemqorlyqtyń túptamyry», - deıdi ol.
