Elimizde 120-ǵa jýyq mektepte úshtildi bilim berý júzege asyrylýda

ASTANA. QazAqparat - Elimizde 120-ǵa jýyq mektepte úshtildi bilim berý júzege asyrylýda. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte QR Ulttyq ekonomıka mınıstri Erbolat Dosaev málim etti.

«2016 jylǵy 1 qyrkúıekten 12 jyldyq bilim berýge kóshý maqsatynda eldiń barlyq mektepterinde 1-shi synyptar úshin bastaýysh mekteptiń 24 oqý baǵdarlamasy, negizgi mektep jáne joǵary synyptar mektebiniń 84 oqý baǵdarlamasy ázirlendi. 22 ádistemelik qural men jalpy bilim berý mektepteriniń muǵalimderi úshin 31 usynym daıyndaldy. Búgingi tańda eldiń 117 bilim berý uıymy úshtildi bilim berýdi iske asyrdy», - dedi E.Dosaev.
Sonymen qatar, ol ındýstrııaldy-ınnovatsııalyq damý memlekettik baǵdarlamasy kadrlaryn daıarlaý úshin 11 bazalyq joǵary oqý oryny 78 shetel ýnıversıtetimen yntymaqtastyq týraly kelisimshart jasasqanyn atap ótti.
«2017 jyldan bastap, tegin kásibı-tehnıkalyq bilim berýge kóshý aıasynda Dúnıejúzilik banktiń «Tehnıkalyq jáne kásibı bilim berýdi jańǵyrtý» jobasy boıynsha 6 kolledj 425 mln. teńge somaǵa grant aldy», - dedi mınıstr.