Elimizde 11 áýejaı qaıta jańǵyrtylady - QR KKM
ASTANA. 26 qarasha. QazAqparat - 2017 jylǵa deıin elimizdegi áýejaılardyń barlyǵynda ushý-qoný jolaqtary tártipke keltiriledi. Bul týraly búgin Úkimet otyrysynda Kólik ınfraqurylymyn 2020 jylǵa deıingi damýy jónindegi memlekettik baǵdarlamany tanystyrý kezinde Kólik jáne kommýnıkatsııa mınıstri Asqar Jumaǵalıev málim etti.
Belgili bolǵanyndaı áýejaı jelilerin damytý aıasynda elimizde 11 áýejaı qaıta jańǵyrtylady. Osy oraıda áýejaılardaǵy 5 ushyp-qoný jolaqtaryn qaıta jasaý josparlanyp otyr. «Aldaǵy jyly Oral, Petropavl qalalarynda ushyp-qoný jolaqtaryn qaıta qurý jumystary jalǵasady. 2017 jylǵa deıin barlyq jolaqtardy tıisti tártipke keltiremiz», - dedi mınıstr. Buǵan qosa ol shaǵyn avıatsııany damytý máselesine toqtala kelip, jergilikti atqarýshy organdarmen shaǵyn avıatsııa aerodromdaryn qurý máselesi qarastyrylǵanyn jetkizdi. Birinshi kezeńde osyndaı 16 aerodrom josparlanyp otyr. Búginde olardyń tehnıkalyq-ekonomıkalyq negizdemesi ázirlenýde. Aıta keteıik, 2020 jylǵa deıin 75 jańa halyqaralyq áýe qatynasy ashylady dep kútilýde.
