Elimizde 100-den astam eńbek mıgrantynan týberkýlez tabyldy
ASTANA. QazAqparat - Jyl basynan beri elimizde 360 myńnan astam eńbek mıgranty tirkelgen, dep habarlaıdy QazAqparat Habar 24 agenttigine silteme jasap.
Onyń 10 myńǵa jýyǵy kóshi-qon týraly zańdy buzǵany úshin el aýmaǵynan májbúrli túrde shyǵarylsa, 2 jarym myń jumys berýshi ákimshilik jaýapkershilikke tartylǵan. Elimizdiń kóshi-qon týraly zańyna sáıkes, ár qazaqstandyq azamat syrttan eń kóp degende 5 eńbek mıgrantyn jumysqa jumyldyrýǵa quqyly.
«Alaıda olardyń qyzmet merzimin asyryp alý jaǵdaılary kóbeımese, azaımaı otyr», - deıdi quzyrly komıtet ókilderi.
Osyǵan baılanysty sala mamandary eki qolǵa bir kúrek izdep kelgen mıgranttardy zań aıasynda maýsymdyq jumystarǵa qabyldap, olardyń densaýlyq jaǵdaıyna da mán berýge shaqyrady.
«Birinshiden, kelgende 5 kún ishinde ýaqytsha tirkeýge qoıasyz. Sodan keıin dárigerlik medıtsınalyq tekseris ótkizedi. Sosyn salyq tóleısizder. Ár aıǵa 2 aılyq eseptik kórsetkishten. 1-3 aıǵa deıin merzimge alýǵa bolady. Sosyn kóshi-qon polıtsııasyna barasyz, sol jerden daktıloskopııa izderin alady. Sodan keıin kóshi-qon polıtsııasymen ruqsat beriledi», - deıdi QR ІІM Kóshi-qon komıtetiniń aǵa ınspektory Manarbek Turlybekuly.
Sońǵy 4 jylda elde 44 myń sheteldik mıgrant medıtsınalyq tekseristen ótken. Týberkýlez belgilerin anyqtaý boıynsha skrınıngter de júrgizildi. Dıagnostıka nátıjesinde 1607 azamattyń qurt aýrýyna shaldyqqany belgili boldy. Onyń 1206-sy ishki jáne 401-i syrtqy eńbek mıgranttary. Dert anyqtalǵaly bir jyl ishinde emdelmese, juqpaly aýrý osynsha ýaqyt aralyǵynda 10-15 adamǵa taraýy múmkin. Atalǵan másele elordada «Ortalyq Azııa elderinde týberkýlezdi transshekaralyq baqylaý jáne emdeý» atty 4-aımaqtyq kezdesýde talqylanbaq. 1994 jyldan beri qolǵa alynǵan «Prodjekt Hoýp» jobasy sheńberinde 50-ge jýyq emhanamen kásibı áriptestik ornady.
Jyl basynan beri týberkýlezge qarsy kúres jahandyq qory osy maqsattarǵa shamamen 50 mln teńge bólgen.
«Joǵary deńgeıdegi 4-kezdesý - birinshi kezekte týberkýlez aýrýynyń Ortalyq Azııa óńirinde taralýyna qarsy baǵyttalǵan birden-bir shara. Jyl basynan baqylaýǵa alynǵan 42 myń mıgranttyń 15 myńy skrınıngtik tekseristen ótip, juqpaly dert 117 adamnan anyqtaldy. Naýqastardyń shamamen 77 protsenti Qazaqstanda emdelse, syrtqy mıgranttardyń 9 protsenti emdi óz elderinde qabyldap jatyr», - deıdi Project HOPE jobasynyń Qazaqstandaǵy ókili Bahtııar Babamýradov.
Dúnıejúzilik densaýlyq saqtaý uıymynyń dereginshe, jalpy týberkýlez derti álemde ólimge sebepshi 10 negizgi faktordyń qataryna jatady. Ótken jyly atalǵan aýrýǵa 10 mln adam shaldyqqan. Onyń ishinde 1 mln 600 myńy kóz jumdy.
