Elimizde 100-den astam bala jasy kelse de mektepke barmaǵan

ASTANA. QazAqparat – Bıyl oqý jylyna daıyndyq barysynda jasy tolyp, biraq mektepke barmaý boıynsha 105 fakti tirkeldi. Bul týraly Oqý-aǵartý vıtse-mınıstri Edil Ospan aıtyp berdi, dep habarlaıdy QazAqparat tilshisi.

Ortalyq kommýnıkatsııalar qyzmeti alańynda ótken baspasóz máslıhaty barysynda «Jańa oqý jylyna daıyndyq barysynda jasy tolǵan balalardyń mektepke barmaýy boıynsha qansha fakti tirkeldi?» degen saýal qoıyldy.

«Mınıstrliktiń bilim berý uıymdary týraly buıryǵyna sáıkes, orta bilim berý mekemeleri osyndaı faktiler anyqtalsa, tıisti sharalar qabyldaýy kerek. Búgingi tańda balalardyń mektepke barmaýynyń 105 faktisi tirkeldi jáne ol boıynsha mınıstrlik jumys júrgizip jatyr. Sonymen qatar ata-analarmen túsindirý jumystary júrgiziledi. Eger ol balalarǵa qatysty qandaı da bir qıyndyqtar men problemalar bolsa, másele áleýmettik qyzmettermen birlesip sheshiledi», - dep jaýap berdi Oqý-aǵartý vıtse-mınıstri Edil Ospan atalǵan saýalǵa.

Aıta keteıik, «Mektepke jol» respýblıkalyq aktsııa aıasynda 450 myń muqtaj otbasy balalaryna kómek berildi.

Sondaı-aq, brıfıng barysynda Abaı oblysyndaǵy orman órtinen zardap shekken otbasy balalaryna qarjylaı kómek bólingeni aıtyldy.