Elimizde 10 jyl boıy izdeýde júrgen Qyrǵyzstan azamaty ustaldy
ASTANA. QazAqparat - Arys stansasyndaǵy Jelilik polıtsııa bóliminiń krımınaldyq polıtsııa qyzmetkerleri jeke basyn anyqtaý úshin ustalyp, Arys st. JPB qabyldap taratý-ornyna otyrǵyzylǵan er adamnyń 2006 jyldan beri memleketaralyq izdeýde júrgen Qyrǵyz Respýblıkasy Osh oblysynyń týmasy ekenin anyqtady.
Kóliktegi ІІD baspasóz qyzmetiniń habarlaýynsha, atalǵan azamat 2006 jyldyń 29 sáýirinde Qyrǵyz Respýblıkasy Úkimetiniń janyndaǵy Jazany oryndaýdyń memlekettik qyzmeti mekemesinen qashyp, tergeýden jasyrynyp kelgen. Onyń ústinen osyǵan deıin Qyrǵyz Respýblıkasynyń Qylmystyq kodeksiniń 336-babynyń 1-tarmaǵy boıynsha qylmystyq is qozǵalǵan.
Ustalǵan azamatqa qatysty «qamaqqa alý» jolyn kesý sharasy qoldanyldy.
Qazirgi ýaqytta ekstradıtsııalaý máselesi qaralyp jatyr.
