Elimizde 10 myń jas sabaqqa barmastan stýdent retinde tirkelip kelgen
«Bilim sapasy tómen 15 joǵary oqý orny jumysyn toqtatty. Taǵy oqytý sapasy nashar 65 JOO-dan 500-den astam lıtsenzııa keri qaıtaryldy. Sondaı-aq 30 kolledj jumysyn toqtatyp, tıisti deńgeıde bilim bermegen mamandyqtar boıynsha 2000 lıtsenzııa mınıstrlikke qaıtaryldy.
100 myńnan astam stýdent basqa joǵary oqý oryndaryna aýystyryldy. Sonymen qatar tekserý kezinde is júzinde oqytylmaǵan on myńǵa jýyq stýdent oqýdan shyǵaryldy. Joǵary oqý oryndarynda olardyń qujattary da bolmaǵan», - dedi vedomstvo basshysy.
Onyń aıtýynsha, 2021 jyly jekemenshik mektepter sany artqan.
«Ótken jyly 170-ke jýyq jekemenshik mektep ashyldy. Bul, eń aldymen, jan basyna qarjylandyrýdy engizý jáne memlekettik tapsyrysty ornalastyrýdyń nátıjesinde júzege asyryldy», - dep jazdy mınıstr.
Ashat Aımaǵambetov jelidegi jazbasynda joǵary oqý oryndarynyń basshylary konkýrstyq rásim arqyly qaıta taǵaıyndalǵanyn atap ótti.
«Basshylyqqa bilikti ári jas mamandar keldi. Olardyń arasynda Kembrıdj ýnıversıtetiniń, Pensılvanııa ýnıversıtetiniń, Nazarbaev ýnıversıtetiniń, «Bolashaq» baǵdarlamasynyń jáne álemniń basqa da jetekshi ýnıversıtetteriniń túlekteri bar. Sondaı-aq, álemniń jetekshi ýnıversıtetteriniń 20-dan astam túlegi provost jáne prorektor bolyp taǵaıyndaldy. Prezıdenttik jastar kadrlyq rezerviniń músheleri mınıstrlik pen vedomstvolyq baǵynyshty uıymdardaǵy jumysqa belsene aralasa bastady», - dedi Bilim jáne ǵylym mınıstri.