Elimizde 10 mln. gektar jaıylym qalpyna keltiriledi - Ó.Shókeev
ASTANA. 3 shilde. QazAqparat /Marlan Jıembaı/ - Elimizde 10 mln. gektar jaıylym qalpyna keltiriledi. Bul týraly búgin «QazAgro» holdınginiń jumysymen tanysqan QR Premer-Mınıstriniń birinshi orynbasary Ómirzaq Shókeev aıtty.
Elimizdiń Aýyl sharýashylyǵy mınıstrligi jaıylym jerlerdi tıimdi paıdalaný boıynsha arnaıy baǵdarlama ázirlep jatqandyǵyn eske salǵan ol: «Qazirgi ýaqytta biz osy baǵdarlamaǵa 10 mln. gektar jaıylymdy aıtarlyqtaı kóp emes qarjyǵa shuǵyl ári tıimdi qalpyna keltiretin tásilderdi ázirledik», - dedi.
Ó.Shókeevtiń atap ótýinshe, baza retinde Qaraǵandy oblysynyń Shet aýdanynda qoldanylǵan tájirıbe qarastyrylý ústinde. Búgingi tańda memlekettik baǵdarlamanyń tetikteri tyńǵylyqty zerdelenip jatyr. «Taıaý aılardyń ishinde biz Úkimet otyrysyna jobany engizetin shyǵarmyz. Óıtkeni baǵdarlamanyń ekinshi bóligi jem-shóp bazasy men veterınarııany damytý bolyp tabylady», - dedi Premer-Mınıstrdiń birinshi orynbasary.
