Elimizde 10 qalanyń aýasy lastanǵan
Ekologııa jáne tabıǵı resýrstar mınıstri Zúlfııa Súleımenova málimetine súıensek, elimizde atmosferalyq aýasy lastanǵan 10 qala bar. Sonyń biri – Atyraý qalasy.
Bul týraly mınıstr Májilistiń Ekologııa jáne tabıǵatty paıdalaný komıtetinde «Ekologııalyq máseleler jáne olardy sheshý joldary» taqyrybynda ótken keńeıtilgen otyrysta málim etti. Otyrysta Qazaqstannyń ekologııalyq jaǵdaıy, qorshaǵan ortanyń jaı-kúıi men tabıǵı resýrstardy paıdalanýdy jaqsartý boıynsha júrgizilip jatqan jumystar talqylandy.
«Monıtorıng nátıjeleri boıynsha 69 eldi mekenniń 10-y atmosferalyq aýanyń lastanýynyń joǵary deńgeıine jatady. Bul – Astana, Almaty, Qaraǵandy, Temirtaý, Atyraý, Aqtóbe, Balqash, Óskemen, Jezqazǵan, Rıdder qalalary. Jyl saıyn «Jasyl Qazaqstan» ulttyq jobasy sheńberinde elimizdiń iri qalalarynda ornalasqan 16 kásiporynda lastaýshy zattar shyǵaryndylaryn azaıtý jónindegi is-sharalar iske asyrylýda», -dedi Zúlfııa Súleımenova.
Mınıstrdiń málimetinshe, 2022 jyly qorshaǵan ortaǵa teris áser etkeni úshin tólemnen jergilikti bıýdjetke 98,6 mlrd teńge túsken.
Eske sala ketelik, budan buryn ekologter Atyraý aýasynda kúkirtti sýtek shekti normadan asyp ketkenin aıtqan bolatyn.
«Aýa sapasyna taldaý júrgizý kezinde jeldiń baǵyty soltústik-batystan, atmosferalyq aýa temperatýrasy+13S, qysym - 756, ylǵaldylyq - 73% jáne jeldiń jyldamdyǵy sekýndyna 10 metrdi qurady. Bul baǵytta Atyraý qalasynyń oń jaǵalaýynda «Kvadrat» býlaný alańy ornalasqan. Osyǵan oraı atmosferalyq aýadan synama alyndy. «Kvadrat» býlaný alańynda júrgizilgen monıtorıngtiń nátıjesinde kúkirtti sýtek ıngredıentiniń ruqsat etilgen shekti shoǵyrlanýdan asý faktisi anyqtaldy», -dep habarlaǵan edi departamenttiń baspasóz qyzmeti.
