Elimizde 10,6 mln. tonna astyq bastyryldy - B.Saǵyntaev
ASTANA. QazAqparat - Elimizde 10,6 mln. tonna astyq bastyryldy. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte el Premer-Mınıstriniń birinshi orynbasary Baqytjan Saǵyntaev málim etti.
«Bıylǵy jyly kóktem kesh shyqty. Osyǵan baılanysty egistik jumystary da keshirek bastalǵan bolatyn. Munan bólek, basqa daqyldardy egý kezeńinde de birqatar óńirlerde aýa raıy qolaısyz boldy. Maýsym aıynda jaýyn-shashyn qajetti mólsherden kem tústi. Biraq, soǵan qaramastan bıylǵy jyly egin jınaý jumystary óz merziminde bastalyp, jospar boıynsha júrgizilýde», - dedi ol. Onyń atap ótýinshe, egin jınaý jumystaryn qarjylandyrýǵa fermerlerdiń ótinimderi boıynsha 60 mlrd. teńgege jýyq bıýdjet nesıesi berildi. 421 myń tonna janarmaı jeńildetilgen baǵamen bólindi. Onyń ishinde búgingi kúni fermerlerge 300 myń tonna janarmaı jetkizildi. «Astyq qabyldaý kásiporyndary men fermerlerde astyq saqtaýǵa arnalǵan syıymdylyqtar 26 mln. tonnadan asyp jyǵylady. Bul kólem jańa egin men ótken jylǵy astyqty saqtaýǵa jetkilikti», - dedi B.Saǵyntaev. Onyń sózine qaraǵanda, bıyl elimizde 17,3 mln. tonna astyq bastyrylady dep kútilýde. Munan bólek qoımalarda saqtalǵan 5 mln. tonna ótken jylǵy astyq bar. «Búgingi kúni ákimdikter bergen málimetterge sáıkes 9,1 mln. gektar alqaptyń dándi-daqyly jınaldy. Bul jalpy egistik alqabynyń 62 paıyzyn quraıdy. Ónimdiligi gektaryna - 11,6 tsentner. Ótken jylmen salystyrǵanda - 0,7 tsentnerge artyq. 10,6 mln. tonna astyq bastyryldy», - dedi Úkimet basshysynyń birinshi orynbasary.
