Elimizde 1 mln-ǵa jýyq áıel bala kótere almaı júr - professor Sádýaqas Mustafaev
ALMATY. QazAqparat - Almatyda S.Mustafaev atyndaǵy jekemenshik emhanada bedeýlikke shaldyqqan áıelderge arnalǵan ashyq esik kúnderi ótip jatyr. Eki kún ishinde joǵary bilikti mamandar 200-ge jýyq áıelge tegin qyzmet kórsetýdi josparlap otyr.
1999 jyly negizi qalanǵan emhananyń negizgi korpýsy Qaskeleńde ornalasqan. Bıyl jyldyń basynda atalǵan emhananyń Almatydaǵy bólimshesi ashyldy.
Atalǵan emhananyń dırektory, medıtsına ǵylymdarynyń doktory, professor Sádýaqas Mustafaevtyń aıtýynsha, Qazaqstanda bedeýlik kórsetkishi jyldan jylǵa artyp keledi.
«Búginde Qazaqstanda bala týýǵa qabiletti 4 mln 600 myń áıeldiń 18-20 paıyzy bedeýlikke shaldyqqan. ıAǵnı, mıllıonǵa jýyq áıel bir perzentke zar bolyp otyr. Olardyń 60 paıyzy mıoma, túrli isikterge shaldyqqan, qalǵan 40 paıyzy túrli qabyný protsesteriniń saldarynan, gormondyq aýytqýlardan zardap shegip otyr. Sońǵy úshi jylda emhanamyzǵa jubymen kelgen er adamdardyń barlyǵynyń derlik densaýlyǵynda aqaý bar. Urpaq jalǵastyrý qabileti sapasy jaǵynan da, sany jaǵynan da álsiz bolyp jatyr», - dedi S.Mustafaev.
Ortalyqta jylyna 400-den asa ota jasalady. Olardyń teń jartysy áıelderdiń bala súıýge qabiletin saqtap qalýǵa baǵyttalady.
Sondaı aýyr naýqastardyń biri Atyraýlyq 35 jastaǵy kelinshekke keshe ota jasaldy. Ol qazir esin jıdy. Kelinshektiń ishinen 9 isik alynǵan. Naýqas 20 jasynda ınsýlt alǵan eken. Sonda da dárigerler onyń perzent súıý úshin jatyryn alyp qaldy. Professordyń aıtýynsha, atalǵan ortalyqta bir kelinshekten 27 keli isik alynǵan.
«Múmkin meni áriptesterim synaıtyn shyǵar. Biraq, dáriger adam janyn arashalaýdan bólek, onyń problemasyn sheshýi kerek. Biz bir organdy alyp tastaı salatyn qasapshy emespiz», - dedi professor S.Mustafaev.
Al, shıpa izdep kelgen áıelderdiń eń úlkeni 52 jasynda sábı súıgen.
Búgin kelgen naýqastardy gınekolog, mammolog, terapevt, psıhoterapevt, kosmetolog tegin qabyldap jatyr. Sondaı-aq, kishi jambas organdarynyń ÝDZ tegin júrgizilýde. Sondaı-aq, Ońtústik Koreıalyq professor Kım Sý Pom kvant terapııasy, ıne refleks terapııasy arqyly dıagnostıka jasaıdy.
