Elimizde 1 mıllıonnan astam adam koronavırýs boıynsha tekserildi
«2020 jyldyń 6 qańtarynan bastap Densaýlyq saqtaý mınıstrligi memlekettik shekarany ótkizý pýnktterinde sanıtarlyq baqylaýdy kúsheıtip, mıllıonnan astam adamdy tekserip qarady. Búgingi kúni baqylaýǵa 30 myńnan astam adam alyndy. Inkýbatsııalyq kezeńniń aıaqtalýyna baılanysty baqylaýdan azamattardyń negizgi bóligi shyǵaryldy. 6 474 adam áli de baqylaýda», - dedi QR Densaýlyq saqtaý mınıstri Eljan BirtanovÚkimet otyrysynda.
Eljan Birtanovtyń aıtýynsha, 6 qańtardan bastap qazirgi ýaqytqa deıin dene qyzýy kóterilip, jedel respıratorlyq-vırýstyq ınfektsııamen aýyrǵan 186 adam aýrýhanaǵa jatqyzylyp, olardyń 166-y jazylyp shyqqan. Qalǵan 20 adam statsıonarda em alýda. Olardan koronavırýs ınfektsııasy tabylmady.
«Syrqattardan alynǵan synamalar Reseı, Qytaı jáne otandyq óndiristiń test-júıelerimen zertteldi. Barlyq testter Dúnıejúzilik densaýlyq saqtaý uıymymen valıdatsııalandy. Osylaısha, qazirgi tańda barlyǵy 967 adam zerthanalyq tekserýden ótti. Onyń ishinde 544 adam Qytaı Halyq Respýblıkasy men Japonııadan kelgen. 423 adam koronavırýs kúdigimen aýrýhanaǵa jatqyzylǵan nemese naýqastarmen baılanysta bolǵan», - deıdi Eljan Birtanov.
Qazirgi ýaqytta Úkimet rezervinen qarajat bólinip, koronavırýs anyqtalǵan jaǵdaı men vırýs taralǵan elderden kelgen adamdardy karantınge ornalastyrý maqsatynda medıtsınalyq uıymdardyń daıyndyǵy qamtamasyz etilip otyr. Test-júıelerdiń, dárilik zattar men medıtsınalyq buıymdardyń, sondaı-aq jeke qorǵaný quraldarynyń qorlary da jasalǵan.
Eljan Birtanovten keıin sóz alǵan Qazaqstannyń Syrtqy ister mınıstri Muhtar Tileýberdi elimizde osy ýaqytqa deıin koronavırýs ınfektsııasyn juqtyrý jaǵdaıy tirkelmegenin erekshe atap ótti.