Elimizde 1 mıllıonnan astam adam kólik salyǵyn tólemegen
Memlekettik kirister komıteti baspasóz qyzmetiniń málimetinshe, 33 mıllard teńgeniń 4 mlrd teńgege jýyǵy ósimpul qaryzy.
«Búgingi kúni elimizde 1 084 988 jeke tulǵa kólik salyǵyn tólemegen. Olardyń bereshegi 33 mlrd 362 mln 813 myń teńge. Onyń ishinde ósimpul quny 3 mlrd 866 mln 396 myń teńge», - delingen vedomstvonyń QazAqparat tilshisine bergen aqparatynda.
Máselen, bir ǵana Taldyqorǵan qalasy boıynsha kólik salyǵyn 9 myńnan astam adam tólemegen. Olardyń bereshegi 245 mln teńge.
Taldyqorǵan qalasy boıynsha memlekettik kirister basqarmasynyń bas mamany Baýyrjan Bekejanov boryshkerler bereshekti tólemese májbúrli túrde óndiretin bolamyz deıdi.
«Tóleýi tıis qaryzyna baılanysty kúndelikti ósimpul júrip otyrady. Sot oryndaýshylaryna ótkennen keıin belgili bir kezeńnen keıin banktegi shottary buǵattalady. Habarlamalar jiberiledi. Kólikteri tárkilenip, aıyp turaǵyna qoıylady. Qaryzdy tólegennen keıin ǵana kólikterin alýǵa quqy bar», - dedi Baýyrjan Bekejanov.
Osyǵan deıin Almaty oblysynda júk kóligi shatqalǵa túsip, er adamnyń mert bolǵany týraly jazyldy.
