Elimiz jyl saıyn jol apatynan 7 mlrd. dollar joǵaltady
ASTANA. QazAqparat - Elimiz jyl saıyn jol apatynan 7 mlrd. dollar joǵaltady. Bul týraly búgin QR Parlamenti Májilisinde «Qaýipsiz jol qozǵalysy» TRASEKA jobasynyń jetekshisi Alan Ross málim etti.
«Shyn máninde eldiń adamdary men ekonomıkalary zardap shegýde. Sizderdiń elderimizdiń ekonomıkasy jyl saıyn 7 mlrd. dollar joǵaltady. Bul - sizder jolǵa salýǵa josparlap otyrǵan ınvestıtsııalaryńyzdyń jartysy. Bul aqshany ınfraqurylymdar men qyzmetterge paıdalanýǵa bolar edi. Sizderdiń ekonomıkalaryńyzdyń 5 paıyzy - bul qazirgi daǵdarys jaǵdaıynda jol-kólik apatynan joǵaltyp otyrǵan mol qarjy», - dedi ol.
Onyń atap ótýinshe, jol apatynan kóptegen adamdardy joǵaltý - bul tek qana ekonomıka emes sonymen birge eldiń densaýlyq saqtaý jáne áleýmettik damý salasynyń da kúrdeli problemasy. Sondyqtan A.Ross Qazaqstanǵa halyqaralyq tájirıbeni, ásirese, 5 jyldyń ishinde jol apatynan ólim-jitimdi aıtarlyqtaı tómendetken Frantsııanyń tájirıbesin zerdeleýdi usyndy.
«Qazaqstanda jol apatynan jastar, talantty adamdar opat bolýda. Eldiń bolashaǵy sanalatyn olardyń jasy 15-44 jastyń aralyǵynda», - dep qosty ol.
Osy rette sheteldik maman elimizde zamanaýı qaýipsiz joldar salynýy qajettigin basa aıtty. «Jol salýǵa shyǵyndalǵan 1 mıllıon, aýrýhanalarda 25 mıllıon únemdeýge múmkindik beredi. Qaýipsiz joldar salý qajet», - dedi A.Ross.
