Elimiz jańa energııa kózderine muqtaj - mınıstrlik

NUR-SULTAN. QazAqparat - Energetıka mınıstrligi Memleket basshysynyń tapsyrmasyna sáıkes Qazaqstannyń 2035 jylǵa deıingi energetıkalyq teńgerimin ázirledi, dep habarlaıdy QazAqparat.

Onyń sheńberinde elektr energııasyn óndirý men tutynýdyń boljamdy mánderin, jańa óndirýshi qýatty iske qosýdyń qajetti kólemi men qurylymyn esepteı otyryp, energetıkalyq keshendi damytýdy modeldeý jumysy jasaldy.

2035 jylǵa qaraı elektr júktemesiniń eń joǵarǵy kórsetkishi 22,7 GVt deńgeıine jetedi.

10% deıingi kólemde qýat rezervin qamtamasyz etý qajettiligin eskere otyryp, 2035 jylǵa qajettilik 24 GVt-ty quraıtyn bolady.

Energetıkalyq teńgerimge sáıkes 2035 jylǵa qaraı elektr energııasyn tutyný kólemi shamamen 153 mlrd kVt/saǵ quraıdy.

Ýaqyt óte kele isten shyǵýy boljanyp otyrǵan elektr qýatynyń kólemin nazarǵa ala otyryp, otandyq energııa júıesi jańa energııa kózderine óte muqtaj.

«Sondaı-aq generatsııalaý sektoryna ekologııalyq áserdi tómendetý, onyń ishinde parnıktik gaz shyǵaryndylaryn azaıtý (2030 jylǵa qaraı shyǵaryndylardy 1990 jylǵy deńgeıge qaraǵanda 15% tómendetý), 2060 jylǵa qaraı kómirtegi beıtaraptyǵyna qol jetkizý jóninde qabyldanǵan mindettemeler boıynsha birqatar faktorlar áser etetinin atap ótý qajet. Osyǵan baılanysty 2035 jylǵa deıin 10 GVt-tan astam elektr qýatyn, onyń ishinde shamamen 6,5 GVt-y jańartylatyn energııa kózderin paıdalaný obektilerin (kóbinese jel stantsııalaryn) engizý josparlanǵan» delingen habarlamada.

Kún jáne jel elektr stantsııalarynyń elektr energııasyn óndirý-tutynýdyń táýliktik kestesine teris áserin barynsha azaıtý maqsatynda JEK obektileriniń elektr energııasyn jınaqtaý júıelerin qoldaný jónindegi talaptar engiziledi.

Ókinishke qaraı, aýa raıy jaǵdaıyna, jyl jáne táýlik ýaqytyna baılanysty JEK obektilerinen elektr energııasyn óndirýdiń turaqsyzdyǵyn eskere otyryp, olardy eldiń energııa júıesindegi bazalyq qýat kózderi retinde qaraý múmkin emes.

Halyqaralyq qarjy uıymdarynyń kómir elektr stantsııalaryn salý jónindegi jobalardy qarjylandyrýdan jappaı bas tartýyna baılanysty jańa kómir generatsııasyn odan ári engizý múmkindigi shekteýli.

Osyǵan baılanysty eldiń energetıkalyq teńgeriminde bazalyq generatsııanyń jańa kózi retinde belgilengen qýaty 2,4 GVt-tan kem bolmaıtyn atom elektr stantsııasy kózdelgen.