Elimiz úshin mańyzdy jańa kezeńde Parlamentte qaı partııa jumys isteıtinin halyq aıqyndaýy kerek - A. Perýashev
ASTANA. QazAqparat - Elimiz úshin mańyzdy jańa kezeńde Parlamentte qaı partııa jumys isteıtinin halyq aıqyndaýy kerek. Búgin Májilistiń jalpy otyrysynda besinshi saılanǵan Parlament Májilisin taratý jáne jańa saılaýdy taǵaıyndaý týraly QR Prezıdentiniń atyna joldanǵan Úndeýdi talqylaý barysynda «Aq jol» partııasy fraktsııasynyń tóraǵasy, depýtat Azat Perýashev osylaı málimdedi.
Sóz barysynda depýtat Perýashev Májilistegi partııa fraktsııalarynyń bastamasyn tolyq qoldaıtynyn atap ótti.
«Saılaýshylar óz tańdaýyn naqtylap, elimiz úshin mańyzdy jańa kezeńde Parlamentte qaı partııa jumys isteıtinin halyq aıqyndaýy kerek. Qazirgi kúni qoǵamdaǵy turaqtylyq, kelisim men ekonomıkanyń túıitkildi máselesin sheshý burynǵydan da meılinshe ózekti. Kásipkerlerge de silkinister kerek emes. Al jańa saılaý ózekti máselelerge qatysty qoǵamdyq kelisimdi nyǵaıtatynyna senim mol. Máslıhattyq deńgeıdegi jańa saılaýlar da qoǵamnyń ne kútetinin tolyq túsinýge jaǵdaı jasaıdy», dedi A. Perýashev.
Fraktsııa jetekshisi kezekten tys saılaýdy kóp sozbaı ótkizý asa mańyzdy ekenin aıtyp, bunyń Prezıdent reformalaryn saýatty júzege asyrýǵa óz septigin tıgizetinin alǵa tartty.
«Bul erteńgi kúnge degen senimdi nyǵaıtady. Sonymen qatar, jańa kezekten tys saılaý ulttyq bızneske, tutastaı respýblıkaǵa áserin tıgizetin ýaqytsha qıyndyqtardy barynsha jeńil ótkerýge múmkindik beredi dep sanaımyz. Al Májilis pen máslıhat saılaýyn biriktirip ótkizý bıýdjet qarajatyn únemdeý turǵysynan mańyzdy», dedi Azat Perýashev.
