Elimiz tabıǵı jaıylymǵa baı bolǵanymen ony tıimdi paıdalanyp otyrǵan joq - I.Saýer
ASTANA. 17 naýryz. QazAqparat /Marlan Jıembaı/ - Elimiz tabıǵı jaıylymǵa baı bolǵanymen ony tıimdi paıdalanyp otyrǵan joq.
Bul pikirdi búgin Aýyl sharýashylyǵy mınıstrliginde ótken Et jáne sút óndirýshiler men óńdeýshilerdiń ekinshi forýmynda QR Et-sút odaǵy basqarmasynyń tóraǵasy Ivan Saýer aıtty.
Onyń atap ótýinshe, mal sharýashylyǵy salasyndaǵy memlekettiń júrgizip otyrǵan saıasatynyń júzege asyrylýy nátıjesinde, sondaı-aq qabyldanǵan birqatar salalyq baǵdarlamalardyń arqasynda jyl saıyn mal sharýashylyǵy ónimderi óndirisiniń kólemi turaqty ósip keledi. Aldyn ala derekter boıynsha 2011 jylǵy 1 qańtarda ótken jyldyń sáıkes kezeńimen salystyrǵanda barlyq aýyl sharýashylyǵy quryylmdaryndaǵy kórsetkish dınamıkasy oń sıpatqa ıe. Máselen, tiri salmaqta et óndirý 3 paıyzǵa artyp, 1 mln 646 myń tonnany qurady. Sút 1,4 paıyzǵa ulǵaıyp, 5 mln 341 myń tonnaǵa jetti. Múıizdi iri qara mal sany 1,1 paıyzǵa kóbeıip, 6 mln. 160 myńdy, qoı men eshki 2,7 paıyzǵa ósim kórsetip, 17 mln 840 myńdy, shoshqa 2,3 paıyzǵa artyp, 1 mln 356 myńdy, jylqy 1,3 paıyzǵa ósim kórsetip, 1 mln 483 myńdy, qus 1,1 paıyzǵa kóbeıip, 33 mln 36 myńdy qurady.
Degenmen, onyń pikirinshe, elimiz tabıǵı jaıylymǵa baı bolǵanymen ony tıimdi paıdalanyp otyrǵan joq. «Qazaqstanda tabıǵı jaıylymdyqtar 180 mln. gektardy nemese bir malǵa 20 gektardy quraıdy. Álemde buǵan balama joq. Ekinshi orynda kele jatqan eldegi bul kórsetkish -13 gektardy quraıdy», - dedi.
Bul oraıda I.Saýer jaıylymdardy tıimdi paıdalaný úshin zańnamaǵa ózgeris engizý qajet dep sanaıdy. Óıtkeni jaıylymdyqtardyń barlyǵy jeke menshik qolynda bolyp otyr.
