Elimiz stýdentteriniń sany - 629,5 myń
ASTANA. 18 maýsym. QazAqparat -Qazir elimizde 143 joǵary oqý orny bar.
Ondaǵy stýdentter kontıngenti 629,5 myń adamdy qurap otyr. Búgin Májilistegi Úkimet saǵatynda Bilim jáne ǵylym mınıstri Baqytjan Jumaǵulov osylaı málim etti.
Mınıstrdiń aıtýynsha, eger álemde orta eseppen alǵanda 10 myń adamǵa 232 stýdentten kelse, Qazaqstanda bul 377 stýdentti quraıdy. «Biz bul kórsetkishpen AQSh, Reseı jáne taǵy basqa birneshe elden keıingi álemdegi birinshi ondyqtamyz. Alaıda, Eýropadaǵy qaýipsizdik jáne yntymaqtastyq uıymynyń kóptegen damyǵan elderinde bul sandar basqasha. Máselen, Japonııadaǵy kórsetkish 222, Germanııada - 285 adamdy quraıdy. Sondyqtan da, ekonomıkany qajetsiz kadrlarmen toltyra bermes úshin joǵary oqý oryndarynyń jelisin ońtaılandyrý qajet. Bul Elbasynyń tikeleı tapsyrmasy» - dedi B. Jumaǵulov.
