Elimiz qant tapshylyǵy máselesin qalaı sheshedi – komıtet tóraǵasynyń jaýaby

ASTANA. QazAqparat – 3 aıǵa jetetin qant shıkizatyn satyp alý úshin qant zaýyttaryna memleket tarapynan az paıyzben nesıe beriledi. Búgin Astanada ótken qant zaýyttarynyń basshylary men Saýda jáne ıntegratsııa mınıstrliginiń birlesken jıynynda taraptar osyndaı memorandýmǵa qol qoıdy, dep habarlaıdy QazAqparat tilshisi.

«Qant zaýyttaryn qarjylandyrý buryn bolmaǵan. Osy jańa bastama bolyp otyr. Buǵan deıin Úkimet otyrysynda osyǵan qatysty jańa usynystar aıtyldy, erejeler maquldandy. Buǵan 4 qant zaýyty, aqsha beretin saýda jelileri jáne kóptegen jetkizýshiler qatysady. Osy memorandým aıasynda atqarylatyn jumystar qant máselesin tolyq sheship beredi. Degenmen qant zaýyttaryna da qoıylatyn arnaıy talap bar. Olar biz beretin aqsha esebinen óndiriske qajet barlyq qural-jabdyqtardy satyp alýy tıis. Naqty aıtsam, barlyq tehnıkalyq bazasyn jańartady. Qazir Aýyl sharýashylyǵy mınıstrligi qant salasy boıynsha óziniń baǵdarlamasyn qabyldady. Bilýimshe, 2027-2028 jyldarǵa qaraı ózimizdiń qyzylshadan jasalatyn qant 7-den 43 paıyzǵa ósedi», - dedi Erjan Qazanbaev.

Onyń atap ótýinshe, qant zaýyttaryn qardylandyrý úshin jalpy somasy 43 mlrd teńge qarajat qarastyrylǵan. Bastapqyda bul aqshaǵa elimizdegi 4 iri qant zaýyty úsh aıǵa jetetin shıkizat qoryn satyp alýy tıis. ıAǵnı, 140-150 myń tonna qant.

«Bul protsess uzaq merzimdi talap etedi. Óıtkeni, qantty shetelden ákelý 2-3 aı ýaqytty alady. Biz buǵan deıin saýda jelilerimen, qant zaýyttarymen jáne basqa da quzyrly organ ókilderimen kezdestik. Ortaq sheshim, jeńil mehanızm taptyq. Іri kóterme saýda ortalyqtary men saýda jelileri beretin qarjynyń paıyzy men ózge de sharttaryn olar ózderi bekitedi. Al biz, ıaǵnı ákimdikter arqyly beriletin nesıelerdiń úsemeaqysy óte az. Atap aıtsam, onyń ústemaqysy 00,1 paıyz ǵana bolmaq. Ol bizdiń qant zaýyttaryna barynsha tıimdi bolýy úshin jasalyp otyr», - dep atap ótti Erjan Qazanbaev.

Eske salaıyq, buǵan deıin Saýda komıtetiniń tóraǵasy Erjan Qazanbaev aldaǵy ýaqytta qant tapshylyǵy oryn almaıdy jáne onyń baǵasy tómendeıtinin málim etip edi.